बार्सिलोनाले आइतबार साँझ एस्टाडियो सान्टियागो बर्नाबेउमा रियल म्याड्रिडलाई ४-० ले हराएर आफ्नो हालैको इतिहासको सबैभन्दा यादगार रातको आनन्द उठायो। खेलपछि मैदान बाहिर ड्रेसिङ रुममा उत्सवहरू जारी रहेको छ र उनीहरूको पार्टीको भिडियो पूर्ण समयमा साझा गरिएको छ।
भिडियोमा देख्न सकिन्छ कि जेरार्ड पिके जाभी हर्नान्डेजलाई ठूलो अंकमाल गर्नु अघि ठूलो मुस्कानसहित ड्रेसिङ रुममा प्रवेश गर्छन्। बार्सिलोना कोचले आफ्ना धेरै अन्य खेलाडीहरूलाई अँगालो हाले, टोलीले ड्रेसिङ रुमको बीचमा ड्यानी आल्भेस र रिक्वी पुइगलाई सर्कलको बीचमा राख्दै गाउँदै नाच्दै देखिएको छ।
बार्सिलोनाको जितमा पिएर एमेरिक औबामेयाङले २ गोल गर्दा रोनाल्ड अराउजो र फेरान टोरेसले १-१ गोल गरे । पहिलो हाफमा २-० को अग्रता लिएको बार्सिलोनाले दोस्रो हाफमा २ गोल थपेको थियो ।
खेलको सुरुवातमा दुवै टोलीले आक्रमणमा अवसर बुनेपनि बार्सिलोनाले अग्रता लिएपछि भने रियलले निकै फितलो प्रदर्शन गरेको थियो । रियलको फराकिलो हारमा पनि गोलरक्षक थिबाउट कोर्टुवाको व्यक्तिगत प्रदर्शन भने राम्रो रह्यो । उनले बार्सिलोनाको सुन्दर प्रहार विफल पारेका थिए ।
बार्सिलोनाले खेलको २९ औं मिनेटमा सुरुवाती अग्रता लिएको थियो । ओस्मान डेम्बेलेको क्रसमा औबामेयाङले हेडरमार्फत गोल गर्दै क्याटलान टोलीलाई अघि बढाएका थिए ।
पहिलो गोलको ८ मिनेटपछि नै बार्सिलोनाले अग्रता दोब्बर पार्यो । डेम्बेलेको क्रसमा नै अराउजोले हेडरमार्फत गोल गर्दै २-० को अग्रता दिलाएका थिए । रियलले मुख्य फरवार्डबिना खेलेको खेलमा निकै संघर्ष गर्नुपरेको थियो ।
दोस्रो हाफको लागि रियलले दुई खेलाडी परिवर्तन गरेपनि गोलको सिलसिला रोक्न सकेन । दोस्रो हाफको दोस्रो मिनेटमा नै टोरेसले ३ गोलले अघि बढाए । फ्रेन्की डे जोङको पासमा औबामेयाङले दिएको थ्रु बललाई टोरेसले उत्कृष्ट फिनिस गरेका थिए ।
त्यसको ४ मिनेट नबित्दै बार्सिलोनाले विवादका बीच ४-० को अग्रता लियो । सहायक रेफ्रीले झन्डा उठाएपछि रियलका डिफेन्डर मुकदर्शक बन्दा औबामेयाङले टोरेसको पासमा सहजै गोल गरे । रेफ्रीले सुरुवातमा सहायक रेफ्रीकै निर्णयमा अफसाइड दिएपनि भीएआरले गोलको मान्यता दिएको थियो ।
यस जितसँगै बार्सिलोनाले रियल सँगको अंक दुरीलाई १२ अंकमा झारेको छ । बार्सिलोना २८ खेलमा ५४ अंकसहित तेस्रो स्थानमा छ । शीर्षस्थानमा रहेको रियल म्याड्रिडको २९ खेलमा ६६ अंक छ । दोस्रो स्थानको सेभिल्लाको २९ खेलमा ५७ अंक छ ।
