पेरिस सेन्ट जर्मेनका अध्यक्ष नासेर एल खेलाइफीले क्लबले क्रिस्टियानो रोनाल्डो भित्र्याउने ढोका बन्द गरिदिएका छन्। उनले पीएसजीको रोनाल्डोलाई अनुबन्ध गर्ने कुनै योजना नरहेको पुष्टि गरेका हुन्।
यसअघि नै बार्सिलोनाका पूर्व कप्तान लियोनल मेस्सीलाई अनुबन्ध गरेर विश्व फुटबलमा तरंग ल्याएको पीएसजीको नाम पछिल्लो समय ५ पटकका ब्यालुन डी ओर विजेता रोनाल्डोसँग पनि जोडिएको थियो। तर क्लब अध्यक्षका अनुसार भने क्लबले रोनाल्डोलाई भित्र्याउन कुनै प्रकारको कोशिस नगरेको स्पष्ट पारेका छन्।
क्लब छाड्ने प्रयास गरिरहेका रोनाल्डोका एजेन्ट जोर्जे मेन्डेस पेरिसमा रहेकोले रोनाल्डो पीएसजी आउने हल्लाले चर्चा पाएको थियो तर लगत्तै खेलाइफीले उक्त चर्चालाई खारेज गरेका छन्। बिहिबार च्याम्पियन्स लिगको ड्र कार्यक्रममा सहभागी भएका खेलाइफीले पत्रकारसँग बोल्दै भने,”हामीले रोनाल्डोसँग कुनै पनि प्रकारको सम्पर्क गरेका छैनौं।”
बिहिबार भएको च्याम्पियन्स लिगको ड्र मा पीएसजीको समूहमा रोनाल्डो नाम जोडिएको अर्को क्लब म्यानचेस्टर सिटी परेको छ। उक्त समूहमा आरबी लाइपजिंग र क्लब ब्रुज रहेका छन्।
