काठमाडौँ, मोडल तथा कलाकार निशा घिमिरेको मृत्यु भएको छ । नर्भिक अस्पतालमा उपचाररत निशाको बुधबार साँझ ६ः५१ बजे मृत्यु भएको अस्पतालले जनाएको छ।
लगातार सीसीयूमा राखेर उपचार गरिएपनि मोडल घिमिरेको निधन भएकोमा नर्भिक अस्पतालले दुख व्यक्त गरेको छ।
निशालाई खाना पनि पाइपबाट खुवाउने गरिएको थियो। बुधबार बिहानदेखि घिमिरेको स्वास्थ्य अवस्था गम्भीर बन्न पुगेको थियो ।
मंगलबार मात्रै निशा घिमिरेको स्वास्थ्य अवस्थामा अपेक्षित सुधार हुन नसकेको जनाइएको थियो। नर्भिक इन्टरनेशनल अस्पतालद्वारा मंगलबार आयोजित पत्रकार सम्मेलनमा सबै खालका उपचारको पद्धति अपनाउँदा पनि उनको स्वास्थ्यमा सुधार हुन नसकेको अस्पतालका कर्पोरेट कम्युनिकेशन प्रमुख सोमनाथ बास्तोलाले जानकारी दिएका थिए।
