पीएसजी स्टार लियोनल मेस्सीले आफ्नो उत्कृष्ट खेलजीवनमा थुप्रै डिफेन्डरलाई ध्वस्त पारेका छन्। ३४ वर्षीय अर्जेन्टिनी स्टारले निकै सताएको एक डिफेन्डर हुन् म्याक्सिमे गोनालोस।
३२ वर्षीय डिफेन्डर जसले लियोन र रोमा जस्ता क्लबसँग खेलिसकेका छन्, हाल स्पेनिस क्लब ग्रानाडासँग आवद्ध रहेका छन्। टप युरोपियन लिगमा खेल्दै आएका उनले धेरै पटक मेस्सीको सामना गरेका छन्। यस्तोमा उनले गोलसँगको एक विशेष अन्तर्वार्तामा मेस्सी विरुद्ध खेल्दाको अनुभवको बारेमा बताएका छन्।
गोनालोसले भने,”मेस्सी निकै असाधारण खेलाडी हुन्। मैले धेरै पटक उनको विरुद्ध खेलेको छु र अन्य उत्कृष्ट खेलाडी विरुद्ध पनि खेलेको छु। तर मेस्सी अरु सबै भन्दा उत्कृष्ट हुन्। उनी छुट्टै ग्रहका खेलाडी हुन्। उनलाई रोक्न अत्यन्त कठिन हुन्छ।”
६ पटकका ब्यालुन डी ओर विजेताको बारेमा बोल्दै ३२ वर्षीय डिफेन्डरले मेस्सी र अरु कुनै खेलाडी बीच आकाश जमीनको फरक रहेको बताएका छन्। हरेक खेलमा अर्जेन्टिनी दिग्गजलाई विपक्षी खेलाडी कहाँ छन् र उनीहरुलाई कसरी छक्याउन सकिन्छ भन्ने थाहा हुने कारणले पनि मेस्सी विरुद्ध डिफेन्ड गर्न अत्यन्त कठिन हुने स्पष्ट पारेका छन्। “उनले एकै सेकेण्डमा तपाईंलाई छाक्याउन सक्छन्। त्यसका लागि मेस्सी जिनियस हुन् र हामी अबको सयौं वर्षसम्म पनि उनी जस्तो अर्को खेलाडी देख्ने छौनौं,” गोनालोसले भने।
हालै मात्र बार्सिलोनामा २१ वर्ष बिताएपछि पेरिस सेन्ट जर्मेन पुगेका मेस्सीको अब लिग खेलमा सामना गर्न नपर्दा ग्रानाडा डिफेन्डरले राहतको सास फेर्न सक्छन्।
