एजेन्सी – पछिल्ला दिनहरुमा किलियन एम्बाप्पे र नेयमार बीच सम्बन्ध बिग्रिएको भनेर चर्चा थियो। नेयमारले पास नदिएका कारण एम्बाप्पे रिसाउँदै नेयमारलाई गाली गरेको भिडियो नै बाहिरिएको थियो। उक्त भिडियोले फुटबलवृतमा तरंग नै पैदा गरेको थियो। धेरैले नेयमारसंग एम्बाप्पेको सम्बन्ध बिग्रिएको भनेर अनुमान गरेका थिए।
मंगलबार राति च्याम्पियन्स लिग अन्तर्गत म्यानचेस्टर सिटी विरुद्धको खेलमा भने त्यस्तो केहि देखिएन। एम्बाप्पेको नेयमारसंग मात्र नभई लियोनेल मेस्सीसंग पनि राम्रो तालमेल मिलेको देखियो।
सिटी विरुद्धको खेलमा एम्बाप्पेकै पासमा मेस्सीले गोल गर्न सकेका थिए। ७४औं मिनेटमा एम्बाप्पेले दिएको पासलाई मेस्सीले सिधै पोस्टको बाटो देखाए।
तालमेल मिल्न थालेको हो ?
गएको तीन खेलमा मेस्सी-नेयमार-एम्बाप्पे बीच राम्रोसंग तालमेल मिल्न सकिरहेको थिएन। तीनै खेलाडी एक साथ उत्रिएको खेलमा पिएसजीले झनै कम्जोर प्रदर्शन गरेको थियो। तर सिटी विरुद्ध भने मेस्सी-नेयमार-एम्बाप्पे ट्रियो बीच राम्रो तालमेल मिलेको देखियो। आवश्यक परेको अवस्थामा तीनै खेलाडी एक अर्कालाई सहयोग गर्न तयार देखिए।
यसै बीच सिटीलाई पराजित गरेपछि मेस्सी र नेयमारले जितपछि खिचिएको तस्विर सामाजिक संजालमा सार्वजनिक गरेका छन्। नेयमार र मेस्सीले एकै तस्विर सार्वजनिक गरेका हुन्।
