निकोलस ओटामेन्डीले अन्सु फातीलाई बेन्फिकाको बार्सिलोना विरुद्धको जितमा “तिमी मेस्सी हो र ?” भन्दै जिस्काएका छन्। गत अगस्टमा मेस्सीले बार्सिलोना छाडेर फ्रे-ट्रान्सफरमा फ्रेन्च क्लब पेरिस सेन्ट जर्मेन (पीएसजी) गएपछि बार्सिलोनाले नयाँ जर्सी नम्बर १० को रूपमा अन्सु फातीलाई सार्वजनिक गरेको थियो।
चोटका कारण करिब ११ महिना मैदान बाहिर रहेका स्पेनिस स्ट्राइकर गत शनिबार मात्र लेभान्ते विरुद्धको खेलमा गोलका साथ पुनरागमन गरेका थिए। यस्तोमा मेस्सीको बहिर्गमनपछि टुटेको बार्सिलोनाको आशाको किरण रहेका थिए १८ वर्षीय फाती। तर अर्जेन्टिनी राष्ट्रिय टोलीमा मेस्सीसँग लामो समय देखि खेल्दै आएका ओटामेन्डीलाई भने त्यसो लागेन।
https://twitter.com/i/status/1443501339158458368
मंगलबार बार्सिलोनालाई ३-० ले पराजित गरेको खेलमा बेन्फिकाका स्टार डिफेन्डर ओटामेन्डीले आफूलाई फातीले फल गरेपछि उनले जर्सी नम्बर १० लगाएकोमा गिज्जाएका छन्। बार्सिलोनाले च्याम्पियन्स लिगमा लगातार ३-० को हार बेहोरेको छ। पहिलो खेलमा जर्मन क्लब बार्यन म्युनिखसँग पनि बार्सिलोना ३-० ले पराजित भएको थियो।
बार्सिलोनाको अर्को खेल डिनामो किभ विरुद्ध रहेको छ। समूह ‘इ’ मा दुई खेलमा हार बेहोरेको बार्सिलोना पुछारमा रहेको छ। दुई खेलमा दुई जीत निकालेको बार्यन शिर्ष स्थानमा रहँदा ४ अंकका साथ बेन्फिका दोस्रो स्थानमा छ भने तेस्रो स्थानको डिनामो किभको एक अंक रहेको छ।
