एजेन्सी – पेरिस सेन्ट जर्मेन(पिएसजी)का युवा स्टार किलियन एम्बाप्पेले लियोनेल मेस्सीसँग खेल्ने कुरा आफूले कहिले पनि कल्पना नगरेको बताएका छन्। एक मिडियालाई विस्तृत अन्तर्वार्ता दिनेक्रममा एम्बाप्पेले मेस्सीसँग खेल्ने सपना कहिले पनि नदेखेको बताएका हुन्।
मेस्सीले बार्सिलोना छाड्छन् होला भनेर आफूले कहिले पनि नसोचेको हुँदा उनीसँग एक टीममा रहेर खेल्ने सपना नदेखेको एम्बाप्पेले बताए। मेस्सीसँग खेल्ने कहिल्यै सपना नदेखेपनि खेल्न पाउनु भाग्यको कुरा रहेको एम्बाप्पेको भनाई छ।
“मेस्सी यहाँ आउँछन् होला भनेर मैले कहिले पनि कल्पना गरेको थिइनँ।”,एम्बाप्पेले भने,”मैले मेस्सीसँग खेल्छु भनेर कहिल्यै सोचेको थिइनँ। मेस्सी ती खेलाडीमा पर्छन्, जोसंग मैले खेल्न असम्भव सोचेको थिएँ।”
मेस्सी बार्सिलोना छाडेर पिएसजी आउनु नै धेरै अचम्मको कुरा रहेको एम्बाप्पेले बताए। मेस्सी पिएसजीको जर्सीमा देख्दा अजिव लागेको एम्बाप्पेको भनाई छ। उनले भने,”मेस्सीले बार्सिलोना छाड्छन् भन्ने मैले कहिले पनि सोचेको थिइनँ। भन्ने हो भने मेरा अनुसार उनले बार्सिलोना छाड्ने नै थिएनन्। “
मेस्सी पिएसजीमा हुनु असाधारण कुरा रहेको एम्बाप्पे बताउँछन्। मेस्सी अलि लजालु स्वभावको पाएको एम्बाप्पेको भनाई छ। मैदानमा भने उनी लजालु नरहेको एम्बाप्पेले बताए।
मेस्सी हिड्दै गर्दा आफू कुद्न तयार रहेको पनि एम्बाप्पेले बताए। स्थापित पदानुक्रम अनुसार मेस्सीले गोल गर्न कम मिहिनेत गर्नुपर्ने र आफूले बढी मिहिनेत गर्नुपर्ने एम्बाप्पेको भनाई छ। र त्यसको लागि आफू तयार भएको एम्बाप्पेले बताए।
“मेस्सी मेस्सी नै हुन्। यो स्थापित पदानुक्रम हो कि गोल गर्न उनले हिडे मात्र पुग्नेछ, तर हामीले कुद्नुपर्नेछ।”,एम्बाप्पेले भने,”मेस्सी हिड्दैछन् भने कुद्न म तयार छु। आखिर उनी मेस्सी न परे।”
