एजेन्सी – मेलबर्न स्टार्सले बिग ब्यास लिगमा उत्कृष्ट लयलाई कायम राख्दै पर्थ स्कोर्चर्सलाई उसकै मैदानमा ८ विकेटले पराजित गरेको छ ।
मेलबर्नले जितका लागि पछ्याएको ८७ रनको लक्ष्य मात्र २ विकेट गुमाउँदै १२ ओभरमा प्राप्त गर्यो । मेलबर्नका लागि उच्च लयमा रहेका ओपनर मार्क्स स्टोइनिसले नटआउट ३९ रन जोडे । उनले ३१ बलको सामना गर्दै ६ चौका प्रहार गरे । स्टोइनिसले जारि बीबीएल सिजनमा ५ सय रनको आंकडा पनि पार गरेका छन् ।
अर्का ओपनर हिल्टन कार्टराइटले १९ तथा बेन डंकले ८ रन जोडे । विकेटकिपर सेब गचले नटआउट १४ रनको योगदान दिए । पर्थका लागि कप्तान मिचेल मार्स र फवाद अहमदले १-१ विकेट हात पारे ।
त्यसअघि पहिलो ब्याटिङ गरेको पर्थले १३.५ ओभरमा अलआउट हुँदै मात्र ८६ रन जोड्दा नेपाली लेग स्पिनर सन्दीपले ३ ओभरमा १ मेडनसहित ७ रन खर्चेर २ विकेट लिए । सातौं ओभरमा बलिङ गर्न आएका सन्दीपले पहिलो ओभरमा मात्र ३ रन खर्चिए । नवौं ओभरमा दोस्रो ओभर फ्याँकेका उनले जम्मा ४ रन खर्चेर विपक्षीलाई दबाबमा राखीरहे ।
सन्दीपले १३ औं ओभरमा उत्कृष्ट बलिङ गर्दै मेलबर्नलाई खेलमा बलियो स्थितिमा ल्याए । पहिलो दुई बल डट राखेका उनले तेस्रो बलमा क्रिस जोर्डनलाई बेन डंकको हातबाट क्याच गराए । लगत्तै अर्को बलमा उनले झाई रिचार्डसनलाई बोल्ड गर्दै ह्याट्रिकको अवसर पाए । त्यसपछि लगातार दुई बल डट फ्याँक्दै उनले ह्याट्रिक लिन नपाएपनि विकेट मेडन हासिल गरे ।
पर्थका लागि ओपनर जोश इंग्लिसले ३७ रन जोड्नुबाहेक अन्य कुनै ब्याट्सम्यानले उल्लेख्य योगदान दिन सकेनन । लगातार विकेट गुमाएको घरेलु टोलीका लागि इंग्लिसबाहेक जम्मा दुई ब्याट्सम्यानले बाउन्ड्री प्रहार गरे । कप्तान मिचेल मार्स ७, लियाम लिभिङ्स्टोन ४, क्यामरन ग्रीन ४, क्यामरन ब्यानक्रफ्ट १० र टिम डेविड मात्र ३ रनमा आउट भए । जेरोन मोर्गन १, जोर्डन ५, रिचर्डसन १ र फवाद अहमद ६ रनमा पेभेलियन फर्किए ।
मेलबर्नका लागि सन्दीपले २ तथा ज्याक्सन कोलमनले ३ विकेट लिए । कुल्टर नेल, हरिस रौफ र कप्तान ग्लेन म्याक्सवेल पनि १-१ विकेट लिए । मेलबर्न यस जितसँगै १० खेलमा ९ जितसहित १८ अंक जोड्दै लिगको शीर्षस्थानमा छ । दोस्रो स्थानको सिड्नी सिक्सर्सको १२ अंक मात्र छ ।
