काठमाडौँ – प्रहरीले रक्तचन्दनको तेल सहित एक जनालाई पक्राउ गरेको छ। कारमा लुक्याएर ल्याइरहेको रक्तचन्दनको तेल सहित एक जनालाई प्रहरीले काठमाडौंको महाँकालबाट पक्राउ गरेको हो।
पक्राउ पर्नेमा सिन्धुपाल्चोकको भोटेकोशी गाउँपालिका–६ हिम्दी घर भएका ३० वर्षीय छिरिङ शेर्पा रहेका छन्। हाल बौद्ध, नयाँबस्ती बस्ने शेर्पाले चलाइरहेको कारमा ४ लिटर रक्तचन्दनको तेल फेला परेपछि नियन्त्रणमा लिइएको प्रहरीले जनाएको छ।
महानगरीय प्रहरी परिसर काठमाडौंले दिएको जानकारी अनुसार उनलाई सोमबार पक्राउ गरिएको हो। पक्राउ गरिएका उनी माथि महानगरीय प्रहरी वृत बौद्धले अनुसन्धान गरिरहेको छ ।
केहि दिन अगाडी मात्रै प्रहरीले काठमाडौंको तिलगंगाबाट रक्तचन्दनको तेल तस्कारी गरेको आरोपमा १० जनालाई नियन्त्रणमा लिएको थियो। महानगरीय अपराध महाशाखाको टोलीले उनीहरुको साथबाट रक्तचन्दनको ३३ लिटर तेल बरामद गरेको थियो।
