२० वर्षअघि सेनेगल फुटबलको सुनौला पुस्ता पहिलो पटक अफ्रिका कप अफ नेसन्सको उपाधि संघारमा थियो। तर अलिउ सेसे निर्णायक पेनाल्टी प्रहारमा चुकेपछि सेनेगलले मालीमा क्यामरुनलाई उपाधि सुम्पियो।
सन् २००२ को विश्वकपमा सेनेगलले साबिक विजेता फ्रान्सलाई स्तब्ध पार्यो तर टर्कीसँग पराजित भएसँगै सेनेगलको विश्वकप यात्रा क्वार्टरफाइनलमा अन्त्य भयो। सेनेगल फुटबलको सुनौलो पुस्ताको कप्तानी सेसेले गरेका थिए।
बलियो टोली भए पनि सेनेगलले अफ्रिका कप अफ नेसन्सको उपाधि जित्न सकेको थिएन। पश्चिमी अफ्रिकी मुलुक सेनेगल सन् २०१९ मा पनि अफ्रिका कप अफ नेसन्सको उपाधि संघारमा पुगेको थियो तर अल्जेरियासँग पराजित भएपछि सेनेगल उपविजेतामै सीमित भयो।
उनै सेसेको प्रशिक्षणमा इजिप्टमाथि पेनाल्टी सुटआउटमा ४–२ को जितसहित सेनेगलले अफ्रिका कप अफ नेसन्सको उपाधि जित्यो।
‘विगतमा जे भयो, त्यसलाई सम्झेर केही अर्थ छैन,’ सेसेले भने, ‘हामीसँग अहिले सन् २००२ र २०१९ को भन्दा बलियो टोली छ। हामीले यस पटक विगतको गल्ती दोहोर्याएनौं। त्यो नै उपाधि सफलताको सूत्र हो।’
सन् १९७६, मार्च २४ मा सेनेगलको दक्षिणपश्चिमी सहर जिगुनचोरमा जन्मिएका सेसे ९ वर्षको उमेरमा परिवारसहित फ्रान्स प्रस्थान गरे।
उनको चाहना कुनै दिन पेरिस सेन्ट जर्मन (पिएसजी) बाट खेल्ने थियो, जुन उनले साकारसमेत पारे। उनले सन् १९९८ देखि २००२ सम्म पिएसजीबाट खेले। त्यसपछि भने उनले इङ्लिस क्लब बर्मिङ्घम सिटी र पोर्टसमाउथबाट डिफेन्सिभ मिडफिल्डरका रूपमा खेले। कहिलेकाहीं सेन्टर ब्याक भूमिकामा पनि देखिए तर क्लब करियरमा उनले विरलै चर्चा पाए। उनले सन् २००९ मा लिग टुको क्लब निम्सबाट व्यावसायिक खेलजीवनमा पूर्णविराम लगाए।
सन् २०१२ देखि २०१३ सम्म सेसेले सेनेगलको यु–२३ टोलीको सहायक प्रशिक्षकको जिम्मेवारी पाए। सन् २०१३ देखि २०१५ सम्म भने उनले सोही टोलीको मुख्य प्रशिक्षकको भूमिका निर्वाह गरे।
‘सेनेगल टोलीबाट मैले ठूलो अपेक्षा राखेको थिएँ, तर हामीले निरन्तर उतारचढाव सहन पर्यो,’ सेसेले भने।
सेसेले सेनेगलको प्रशिक्षण सम्हालेपछि टोलीमा केही परिवर्तन देखिन थाल्यो। उनकै प्रशिक्षणमा सेनेगल फिफा वरीयतामा अफ्रिकाको शीर्ष टोली बन्यो। कप्तान साडियो माने, इडोवार्डो मेन्डी, इडरिसा ग्वेजस्ता खेलाडीहरूको उत्कृष्ट प्रदर्शनमा उनको टोलीले सन् २०१७ को अफ्रिका कप अफ नेसन्समा छनोट हुने क्रममा छनोट चरणका ६ वटै खेल जितेको थियो।
तेरंगा लायन्सको उपनाम पाएको सेनेगलले आलोचनाका बीच सन् २०१८ को विश्वकपको टिकट समेत पक्का गरेको थियो।
-नागरिक दैनिकबाट
