एजेन्सी – पोर्चुगिज फरवार्ड जिएगो जोटा प्रिमियर लिग क्लब लिभरपुलको महत्वपूर्ण खेलाडीको रुपमा उदाएका छन्। लिभरपुल पुगेको डेढ वर्षमै उनी लिभरपुलको मूख्य खेलाडीको रुपमा अगाडी आएका छन्। पहिलो सिजन खासै राम्रो प्रभाव पार्न नसकेपनि सन् २०२१-२२को सिजनमा भने जोटाले लिभरपुलमा धेरै राम्रो प्रभाव जमाएका छन्।
शुरुमा जोटा विश्वस्तरीय फरवार्ड बन्ने छनक देखाएका थिएनन्। तर जारी सिजनमा उनको प्रदर्शन हेर्ने हो भने उनी लिभरपुलका लागि महत्वपूर्ण सम्पत्ति हुने वाला छन्।
जोटाले जारी सिजनमा लिभरपुलका लागि ३० खेल खेलेका छन्। त्यसमा उनले १७ गोल गर्दा १ असिस्ट दिएका छन्। जारी सिजनमा १८ गोलमा जोटाको भूमिका रह्यो।
जोटाले प्रिमियर लिगमा मात्रै एक दर्जन गोल गरिसकेका छन्। कुल २२ खेल खेल्दा उनले यो संख्यामा गोल गरेका हुन्। जोटा प्रिमियर लिगका दोस्रो बढी गोल गर्ने खेलाडी रहेका छन्। पहिलो स्थानमा लिभरपुलकै मोहम्मद सलाह रहेका छन्। उनको गोल संख्या १६ छ। त्यस्तै जोटाले च्याम्पियन्स लिगमा पनि एक गोल गरेका छन्। कप खेलहरुमा जोटाले यस सिजन ४ गोल गरेका छन्।
