काठमाडौँ – मंगलबार धादिङमा भएको एक सवारी दुर्घटनामा परी ६ जनाले ज्यान गुमाएका छन्। यात्रु बोकेको मिनिट्रक दुर्घटना हुँदा ६ जनाको ज्यान गएको हो।
ज्वालामुखी गाउँपालिकामा रहेको मण्डलीथान दर्शन गरेर फर्कंदै गरेका दर्शनार्थी बोकेको ग १ ख १२८० नम्बरको मिनिट्रक दुर्घटना हुँदा ६ जनाको ज्यान जानुका साथै कयौं घाइते भएको जिल्ला प्रहरी कार्यालय धादिङले जनाएको हो।
प्रहरीका अनुसार उक्त दुर्घटनामा परी १९ जना यात्रु घाइते भएका छन्। घाइतेहरुको जिल्ला अस्पताल धादिङमा उपचार भइरहेको जिल्ला प्रहरी कार्यालय धादिङका प्रहरी उपरीक्षक रवीन्द्र रेग्मीले बताएका छन्।
ट्रकमा २५ जना यात्रु रहेको बताइएको छ। घटनामा ज्यान गुमाउनेहरुको सनाखत भने भैसकेको छैन।
