एजेन्सी – प्रिमियर लिगको उपाधि होड थप रोचक बन्दै गएको छ। प्रिमियर लिगमा लिभरपुलले बुधबार राति शानदार जित निकालेसँगै उपाधि होड थप रोचक बनेको हो।
बुधबार राति लिभरपुलले घरेलु मैदानमा लिड्स युनाइटेड विरुद्ध शानदार निकालेको छ। लिभरपुलले सो खेलमा लिड्स युनाइटेडलाई ६–० को गोल अन्तरले पराजित गरेको हो।
लिभरपुलको जितमा मोहम्मद सलाह, साडियो माने, जोएल मटिप र भर्जिल भान डाइकले गोल गरेका थिए। सलाह र माने दुवैले दुई गोल गरेका हुन् भने मटिप र भान डाइकले भने एक-एक गोल गरेका थिए।
एनफिल्डमा बुधबार राति भएको खेलको १५औं मिनेटमा सलाहको पेनाल्टी गोलबाट लिभरपुलले अग्रता लिएको थियो। ३०औं मिनेटमा जोएल मटिपको गोलमा अग्रता दोब्बर भयो। त्यसको ५ मिनेटमै लिभरपुलले पेनाल्टीको अवसर पायो। सो बेला सलाहले पेनाल्टी गोल गरे।
पहिलो हाफमा त्यसपछि कुनै गोल भएनन्। दोस्रो हाफमा पनि तीन गोल भए। ८०औं मिनेटमा मानेले जोर्डन हेन्डरसनको पासमा मानेले गोल गर्न सफल भए। ९०औं मिनेटमा पनि मानेले गोल गरे। मानेको सो गोल सँगै लिभरपुलको अग्रता ५-० को अवस्थामा पुगेको थियो। त्यस्तै थप गरिएको तेस्रो मिनेटमा भर्जिल भान डाइकले गोल गरे।
बुधबारको जितसँगै लिभरपुलले म्यानचेस्टर सिटीसँगको अंक दूरी घटाएको छ। अब सिटी र लिभरपुल बीच मात्रै तीन अंकको अन्तर छ। लिभरपुलले २६ खेलबाट ६० अंक बनाउँदा सिटीले ६३ अंक बनाएको छ।
