एजेन्सी – पेरिस सेन्ट जर्मेन (पीएसजी) फ्रेन्च लिग कपको फाइनलमा पुग्न सफल भएको छ । पीएसजीले १० खेलाडीमा समेटिएको रिम्सलाई ३–० ले पराजित गर्दै फाइनलमा पुग्न सफल भएको हो ।
रिम्समा बुधबार राति भएको खेलमा पीएसजीको सहज जितमा मार्कुन्योस र नियानजोउ कोवासीले गोल गर्दा एक गोल उपहार पाएको थियो । नवौं मिनेटमा नै नेयमारको पासमा कप्तान मार्कुन्योसले गोल गर्दै पीएसजीले खेलमा अग्रता लिएको थियो । नेयमारको पासमा मार्कुन्योसले हेडमार्फत सिक्स यार्ड बक्सबाट गोल गर्न सफल भएका थिए ।
३१औं मिनेटमा रिम्सका कोनानले आत्मघाती गोल गरेपछि पीएसजीले खेलमा २–० को अग्रता लिन सफल भयो । नेयमारको फ्रिकिकमा मार्कुन्योसले प्रयास गर्दा दिसासीले फ्लिक गरेपनि गोललाईनमा रहेका कोनानले बचाउने प्रयास गरेपनि आफ्नै पोस्टमा गोल हुन पुगेको थियो ।
७३औं मिनेटमा रिम्स १० खेलाडीमा समेटियो । मार्काे भेराटीलाई फल गरेपछि रेफ्रीले रिम्सका मार्सल मुनेटसीलाई सिधै रातो कार्ड दिदै मैदान बाहिर पठाएको थियो । त्यसपछि ७७औं मिनेटमा नियानजोउ कोवासीले भली सटमा गोल गर्दै पीएसजीलाई ३–० को जित दिलाउदै फाइनलमा पुर्याउन सफल भयो ।
अब पीएसजीले उपाधिका लागि लियोनसँग ४ अप्रिलमा खेल्नेछ । लियोनले बुधबार राति नै लिललाई पेनाल्टी सुटआउटमा ४–३ ले पराजित गर्दै फाइनलमा स्थान बनाएको थियो । निर्धारित समयको खेल २–२ गोलको बराबरीमा टुंगिएपछि खेल पेनाल्टी सुटआउटमा पुगेको थियो ।
निर्धारित समयमा लियोनका मौसा डेम्वेले र औअरले गोल गरे । लिलका रेनाटो सान्चेज र रेमीले गोल गरे
