एजेन्सी – प्रिमियर लिग शिर्ष चारमा रहेको आर्सनलले महत्वपूर्ण जित निकालेको छ। आइतबार राति आर्सनलले वेष्टह्याम विरुद्ध महत्वपूर्ण जित निकालेको हो। वेष्टह्यामको घरेलु मैदानमा भएको खेलमा आर्सनलले वेष्टह्यामलाई २-१ को गोल अन्तरले पराजित गर्यो।
आर्सनलको जितमा रोब होल्डिङ र गेब्रियलले गोल गरे। खेलको ३८ औँ मिनेटमा होल्डिङले गोल गर्दै आर्सनललाई अग्रता दिलाएका थिए। त्यसको ७ मिनेट नबित्दै वेष्टह्यामले बराबरी गोल फर्कायो। वेष्टह्यामका लागि खेलको ४५ औं मिनेटमा जारोड बोवेनले गोल गरेका थिए। त्यस्तै खेलको ५४ औं मिनेटमा आर्सनलका गेब्रियलले गोल गरे। गेब्रियलको सो गोल निर्णायक सावित भयो।
वेष्टह्याम विरुद्धको खेलमा जित निकालेसँगै आर्सनल शिर्ष चारमा उक्लिएको छ। आइतबारको जितपछि आर्सनलको ६३ अंक भएको छ। आर्सनलले अहिले सम्म सिजनका ३४ खेल खेलेको छ। त्यसमध्ये २० खेलमा जित निकाल्दा आर्सनल ११ खेलमा पराजित भएको छ।
पाँचौ स्थानको टोटनह्याम भन्दा आर्सनल दुई अंकले अगाडी छ। त्यस्तै तेस्रो स्थानको चेल्सी भने आर्सनल भन्दा ३ अंकले अगाडी छ। आइतबार नै भएको खेलमा चेल्सी एभर्टनसँग पराजित भएको थियो। सो पराजयसँगै चेल्सीको तेस्रो स्थान धरापमा परेको छ। चेल्सीको ६६ अंक छ।
यस्तै आइतबार नै अर्को खेलमा टोटेनहमले लेस्टरलाई घरेलु मैदानमा ३-१ ले पराजित गर्यो । टोटेनहमको जितमा ह्युङ मिन सनले २ तथा ह्यारी केनले एक गोल गरे । लेस्टरका केलेची इहेनाचोले सान्त्वना गोल फर्काए ।
टोटेनहमले ३४ खेलमा ६१ अंक जोड्दै शीर्ष ४ मा रहँदै च्याम्पियन्स लिग खेल्ने सम्भावना जीवित राखेको छ । टोटेनहम र आर्सनल दुवै लिगको चौथो स्थान पक्का गर्ने दौडमा छन् ।
