एजेन्सी – म्यानचेस्टर युनाइटेडका पूर्व खेलाडी माइकल ओवेनले भर्जिल भान डाइक फुटबल इतिहाँसकै उत्कृष्ट डिफेन्डर रहेको बताएका छन्। एक टेलिभिजन कार्यक्रमका क्रममा ओवेनले भान डाइक इतिहाँसकै उत्कृष्ट सेन्टरब्याक रहेको बताएका हुन्।
बीटी स्पोर्ट टेलिभिजनमा बोल्दै ओवेनले भान डाइक जस्तो डिफेन्डर आफूले कहिल्यै नदेखेको बताए। भान डाइकको प्रशंसामा उत्रिएका ओवेनले एक कदम अगाडी बढेर भान डाइक इतिहाँसकै उत्कृष्ट सेन्टरब्याक रहेको दावी गरे।
“सुन्नुहोस्, भ्यान डाइक अहिले विश्वका सबैभन्दा राम्रा सेन्टर-ब्याक हुन्। अझ भन्ने नै हो भने मेरा लागि उनी फुटबल इतिहाँसकै उत्कृष्ट सेन्टर-ब्याक हुन्।”,बीटी स्पोर्टको टेलिभिजन कार्यक्रममा बोल्ने क्रममा ओवेनले भने।
ओवेनले रियो फर्डिनान्ड आफूले सँगै खेलेका उत्कृष्ट सेन्टर ब्याक भएपनि भान डाइक जस्तो खेलाडी भने नभएको समेत बताए। भान डाइक जस्ता खेलाडी कहिले पनि नदेखेको ओवेनको भनाई छ।
उनले भने,”रियो फर्डिनान्ड मैले अहिलेसम्म खेलेको उत्कृष्ट सेन्टर ब्याक थिए। तर भान डाइकको कुरा छुट्टै छ। उनी ठूला, छिटो, सबै भन्दा बलियो छन्, उनी बलमा शानदार छन्, उनी गोल पनि गर्छन्। उनी विरुद्ध जाने कसको हिम्मत ?”
