एजेन्सी – ब्राजिलियन लेजेन्ड रोनाल्डिन्होले लिभरपुलका मोहम्मद सलाह विश्वकै उत्कृष्ट खेलाडीहरु मध्ये एक रहेको बताएका छन्। एक मिडियासँग कुराकानी गर्नेक्रममा रोनाल्डिन्होले सलाह विश्वकै उत्कृष्ट खेलाडी मध्ये एक रहेको बताएका हुन्।
किंगफुटसँग कुराकानी गर्ने क्रममा रोनाल्डिन्होले सलाह विश्वकै उत्कृष्ट खेलाडी भएको मात्र बताएनन्, उनीसँग खेल्ने चाहना समेत जाहेर गरे। अहिले फुटबलबाट सन्यास लिसकेका रोनाल्डिन्होको सलाहसँग खेल्न पाए हुन्थ्यो भन्ने भनाई छ।
“मलाई मोहम्मद सलाहसँग खेल्न पाएपनि हुन्थ्यो भन्ने लाग्छ। उनी विश्वका उत्कृष्ट खेलाडीमध्ये एक हुन् जसलाई म सधैं हेर्न चाहन्छु।”,सन् २००२ विश्वकप विजेता समेत रहेका रोनाल्डिन्होले भने।
रोनाल्डिन्होले सलाहलाई खुशी हुने क्लबमा खेल्न सुझाव पनि दिए। भविष्यलाई लिएर सलाहलाई केहि सल्लाह दिनुहुन्छ भनेर प्रश्न गरिँदा रोनाल्डिन्होले जहाँ खुशी मिल्छ त्यहिँ खेल्न आग्रह गरे। फुटबल खुशीको स्रोत हो भन्ने रोनाल्डिन्होको भनाई छ।
उनले भने,”सबैभन्दा महत्त्वपूर्ण कुरा खुशी र सन्तुष्टि हो। फुटबल खुशीको स्रोत हो। मुख्य कुरा आफू कहाँ खुशी र सन्तुष्ट भइन्छ भन्ने हो। यसैलाई आधार बनाएर उनले भविष्य बारे निर्णय गर्दा राम्रो हुन्छ भन्ने मलाई लाग्छ। फुटबल खेल्नु जस्तो राम्रो के हुन सक्ला र ?”
