एजेन्सी – ब्राजिलियन सुपरस्टार नेयमार जुनियरले पेरिस सेन्ट जर्मेन (पीएसजी) बाटै युइएफए च्याम्पियन्स लिगको उपाधि जित्न चाहेको बताएका छन् ।
क्लब छाड्ने चर्चा चलिरहँदा नेयमारले पीएसजीमै रहने र पिएसजीबाटै च्याम्पियन्स लिग जित्ने चाहना व्यक्त गरेका हुन् । पीएसजीमा नेयमारको सम्झौता २०२५ सम्म रहेको छ ।
‘मेरो महत्वाकांक्षा सधैं उस्तै छ, सम्भव भएसम्म हरेक उपाधि जित्ने हो । अर्काे सिजन राम्रो खेल्दै विश्वकप र च्याम्पियन्स लिग जित्ने मेरो लक्ष्य हो ।’ नेयमारले भने, ‘पीएसजीसँग मेरो सम्झौता बाँकी नै छ । पिएसजी छाड्ने कुनै मनासय छैन । म पीएसजीमै हुनेछ ।’
नेयमार सन् २०१७ मा क्याटलान क्लब बार्सिलोनाबाट कीर्तिमानी १ सय ९८ मिलियन पाउण्डमा पीएसजी आएका थिए । तर, नेयमारले पीएसजीबाट च्याम्पियन्स लिग जित्न सकेका छैनन् ।
यस्तै एमबाप्पेले पीएसजीमा गरेको सम्झौता नविकरणबाट आँफु खुशी रहेको बताएका छन् । एमबाप्पेले स्पेनिस क्लब रियल म्याड्रिडको प्रस्तावलाई लत्याउँदै पीएसजीमा ३ वर्षको सम्झौता नविकरण गरेका थिए ।
