एजेन्सी – लिओनेल मेस्सी र क्रिस्टियानो रोनाल्डो मध्ये को उत्कृष्ट भन्ने विषयमा धेरै समय देखि बहस जारी छ। रोनाल्डो र मेस्सीले सन् २००९ देखि २०१८ सम्म स्पेनिस ला लिगमा एक अर्कासँग नियमित प्रतिस्पर्धा गरे। जसक्रममा यी दुई बीच प्रतक्ष्य प्रतिस्पर्धा भयो। मैदानमा यी दुई खेलाडीले लगातार प्रतिस्पर्धा गर्दै पछिल्लो दशक विश्व फुटबलमा वर्चस्व नै कायम गरे ।
रोनाल्डो इटाली गएदेखि भने यी दुई प्रतक्ष्य प्रतिस्पर्धामा छैनन्। यधपी, अझै पनि यी दुई बीच अन्तराष्ट्रिय खेल।च्याम्पियन्स लिग र विभिन्न अवार्डहरुमा भने प्रतिस्पर्धा जारी छ।
दुवैलाई विश्वका धेरै जस्ता खेलाडीहरुले उत्कृष्ट मान्छन्। हाल विश्वका उत्कृष्ट फुटबल खेलाडीको नाम लिनुपर्दा जो-कोहिले मेस्सी र रोनाल्डोकै नाम लिन्छन्।
यसै बीच मेस्सीले आफूहरु बाहेक(रोनाल्डो-मेस्सी) विश्वका पाँच उत्कृष्ट खेलाडीहरुको नाम लिनुपरे मेस्सी एम्बाप्पे, नेयमार, सुआरेज लगायतको नाम लिने बताएका छन्।
मेस्सीका अनुसार पेरिस सेन्ट जर्मेन (पीएसजी)का नेयमार र किलियन एम्बाप्पे, बार्सिलोनाका लुईस सुआरेज, रियल म्याड्रिडका ह्याजार्ड र अर्जेन्टिनी तथा म्यानचेस्टर सिटी फरवार्ड सर्जियो अगुएरो हालका लागि विश्वका उत्कृष्ट फुटबल खेलाडी हुन्।
“रोनाल्डो र मलाई छाड्ने हो भने हालका लागि सर्वश्रेष्ठ खेलाडी एमबाप्पे, नेमार, ह्याजार्ड, सुआरेज र कुन [अगुएरो] हुन्।”,स्पेनिस पत्रिका मार्कासँग कुराकानी गर्दै मेस्सीले भने।
