काठमाडौं । सस्तो ब्याजदरको लोभ देखाई कर्जा दिई बिनाजानकारी ब्याज बढाएर ग्राहक फसाउने आरोप लागेको बैंक अफ काठमाण्डूप्रति सर्वसाधारण मात्र नभई सेलिब्रिटीहरूसमेत ठगिएका छन् । यो समाचार राजधानी दैनिकमा प्रकाशित छ।
लोभ देखाई कर्जा वितरण गर्दा बैंकको खराब कर्जा नै १.४५ प्रतिशत अर्थात् १ अर्ब ५९ करोड रुपैयाँ पुगेको छ ।
कर्जामा ठग्दै आएको सो बैंकले मोबाइल बैंकिङ प्रयोग गर्दा दोहोरो पैसा लिने गरेको अभिनेत्री लक्ष्मी बर्देवाले बताइन् ।
उनले आफ्नो फेसबुकमार्फत बैंक अफ काठमाण्डूको मोबाइल बैंकिङप्रति असन्तुष्टि व्यक्त गरेकी हुन् ।
यसैगरी, बीओकेका अर्का ग्राहक प्रमोद रेग्मी भन्छन्, ‘यस्तो झुर बैंकको इन्टरनेटवर्कको कारणले सेवा नलिनु नै उत्तम हो या खाता बन्द गरी अर्को बैंक प्रयोग गर्दा सर्वोत्तम ।’
अर्का ग्राहक अरुण बाबु श्रेष्ठ भन्छन्, ‘बिनासूचना यो बैंकले मेरो खातामा इन्टरनेट बैकिङ चार्ज भनी कटाएको रकम थाहा पाएपछि मैले निवेदन दिएर कट्टी गरिएको रकम रिभर्स गर्न लगाएको छु ।’
बैंकको सेवाबाट आजित भएका सुदर्शन सुवेदीले भने, ‘बीओकेले सर्वसाधारण बचतकर्ताको नियमित बचतसमेत दुई÷तीन महिनामै खाता ब्लक गरेर केवाईसी, आयकर प्रमाणपत्र आदि झन्झटिलो बनाई पैसा ब्लक गरेर हैरान गर्ने गरेको छ । यो बैंकमा विश्वास नगरौं, कुनै पनि बेला फस्न सक्छ ।’
राष्ट्र बैंकका अनुसार कुनै कार्डबाट भुक्तानी हुँदा रिफन्ड गर्नुपर्ने रकम १४ दिनभित्र ग्राहकको खातामा फर्काइसक्नुपर्ने हुन्छ ।
तर, प्राविधिक समस्याका कारण अभिनेत्री बर्देवाको भुक्तानी गर्नुपर्ने रकम दुईपटक काटियो । यसपछि उनले भाटभटेनीमै समस्या राख्दा सुनुवाइ नभएको बताइन् ।
यसअगाडि पनि यसैगरी दोहोरो रकम काटिने समस्या भोगेको कुरा पनि उनले खुलाएकी छन् ।
बैंक अफ काठमान्डुका यस्ता ग्राहक असन्तुष्ट पार्ने प्रवृत्तिका कारण चालू आर्थिक वर्षको तेस्रो त्रैमासमा खुद नाफा २५.५३ प्रतिशत घटेर ८७ करोड ७ लाख ८१ हजार रुपैयाँमा सीमित भएको छ । गत आर्थिक वर्षको सोही अवधिमा बैंकले १ अर्ब १६ करोड ९३ लाख ४२ हजार रुपैयाँ खुद नाफा आर्जन गरेको थियो ।
बैंकको नाफामा गिरावट मात्रै आएको छैन खराब कर्जासमेत वृद्धि भएको छ । ग्राहकलाई कर्जा लोभ्याउँदै फसाउन थालिएपछि बैंकको कर्जा तिर्न असमर्थ भएपछि बैंकको खराब कर्जा पनि बढ्न थालेको हो ।
बैंकको कर्जा चंगुलमा फस्नेमा सर्वसाधारण मात्र नभई विशिष्ट व्यक्ति पनि परेका छन् । भन्नेबेलामा एकथरी र हस्ताक्षर गराउने समय अर्कोथरीमा हस्ताक्षर गरी बैंकले ग्राहकलाई समस्या पार्दै आएका छन् । सानो अक्षरमा प्रिन्ट गरिएको र पढ्न पनि धेरै समय लाग्ने सर्तमा हतारहतार हस्ताक्षर गराई बीओकेलाई ग्राहकलाई फसाउने गरेको छ ।
२०७३ सालमा हायर पर्चेजमा कर्जा लिएका एक ऋणी बीओकेको कर्जा जालमा अहिले पनि फसी नै रहेका छन् । उनले कर्जा लिएको महिना दिनदेखि नै लगातार बीओकेले कर्जामा ब्याज निरन्तर बढाइरहेको छ ।
मासिक ३८ हजार ४ सय ४५ रुपैयाँ तिर्नेगरी कर्जा लिएका उनी त्यतिबेला झस्के जब मूल कर्जा खासै नघटेको स्टेटमेन्ट हातमा प¥यो । सुरुमा १५ हजार १ सय ४३ रुपैयाँ ब्याज तिर्दा मासिक २३ हजार रुपैयाँ कर्जा घट्दै जाने भनेर भनिएकोमा पछि हुँदाहुँदा ब्याज झन्झन् बढाउँदै लगेको उनले गुनासो गरे ।
कर्जा र ब्याज तिर्दै जाँदा कर्जा घट्दै गई कर्जाको रकम बढ्दै गई ब्याज रकम घट्दै जाने अपेक्षा उनले गरेका थिए । तर, बीओकेले भने जतिजति कर्जा तिर्दै गयो त्यतित्यति कर्जाको प्रिन्सिपल रकम घटाउँदै ब्याजदर बढाउँदै लग्यो ।
उनले भने, ‘सुरुमा ३८ हजार मासिक तिर्दा कर्जाको ब्याज १५ हजार लाग्ने र मूल कर्जा २३ हजार लाग्ने भनियो । यो हिसाबले अर्को महिनाबाट ३८ हजार तिर्दा त मूल कर्जाको रकम बढ्दै जानुपर्ने हो नि । तर, बीओकेले जतिजति ईएमआई भर्दै गयो त्यतित्यति ब्याज प्रतिशत पो बढाएको रहेछ ।’
२०७५ सालसम्म आउँदा बीओकेले ब्याज रकम २६ हजारभन्दा बढी पु¥याइयो । दुई वर्ष कर्जा तिर्दै गएपछि ब्याज रकम घट्दै जानुपर्नेमा झन्झन् बढायो । बीओकेले शतप्रतिशतभन्दा बढी ब्याज बढाएर आफूलाई ठगेको उनको गुनासो छ । नेपाल राष्ट्र बैंकको निर्देशिका उल्लंघन गर्दै बीओकेले कर्जामा अस्थिरता कायम गरी नै रहेको छ ।
