एजेन्सी – उपाधिका दावेदार रियल म्याड्रिड र बार्सिलोना बिहीबार कोपा डेल रे अन्तर्गत क्वाटरफाइनल चरणको खेलमा पराजित हुँदै प्रतियोगिताबाट बाहिरिएका छन् ।
रियल म्याड्रिड घरेलु मैदानमा रियल सोसिडाडसँग ४-३ ले पराजित हुँदा बार्सिलोनाले एथ्लेटिक बिल्बाओको मैदानमा १-० को हार बेहोर्यो । पछिल्लो दशकमा बार्सिलोना र रियल दुवै अन्तिम चारमा प्रवेश गर्न नसकेको यो पहिलो अवसर हो । पछिल्लो दशकमा रियल र बार्सिलोनामा कम्तिमा एक टोली फाइनल पुगेका थिए ।
सन् २००९-१० सिजनमा सेभिल्लाले उपाधि जित्दा यी दुवै फाइनलमा थिएनन् । बार्सिलोना बिल्बाओसँग पराजित भएपछि लगातार ६ सिजन फाइनल पुगेको सिलसिलामा पनि पूर्णविराम लागेको छ । यता घरेलु मैदानमा २१ खेलपछि पराजित रियल पनि लगातार ६ सिजनपछि सेमिफाइनल पुग्नबाट चुक्यो ।
बिल्बाओ कोपा डेल रे मा दोस्रो सफल टोली हो । बिल्बाओले हालसम्म २३ पटक उपाधि जितेको छ । उपाधि दावेदारको रुपमा रहेको बिल्बाओले अब ग्रानडा, सोसिडाड र दोस्रो श्रेणीको क्लब मिरान्डेससँग उपाधिका लागि प्रतिस्पर्धा गर्नेछ । सोसिडाडले रियल म्याड्रिडको लगातार ८ खेलको जितको सिलसिलालाई अन्त्य गर्यो । अक्टोबर २०१९ यता रियल म्याड्रिडले पहिलो हार पनि बेहोर्यो ।
सन् २०१४ यता रियल म्याड्रिडले यस उपाधि जित्न सकेको छैन । पछिल्लो पटक सोसिडाडले सन् २०१४ मा सेमिफाइनल यात्रा तय गरेको थियो । सोसिडाड सन् १९८७ पछि पहिलो र समग्रमा तेस्रो उपाधि जित्ने लक्ष्यमा हुनेछ ।
ग्रानडाले पछिल्लो सिजन उपाधि जितेको भ्यालेन्सियालाई पराजित गर्दै अन्तिम चारमा स्थान पक्का गरेको थियो । मिरान्डेसले भने ला लिगाकै भिल्लारियललाई हराउँदै सेमिफाइनलमा प्रवेश गरेको थियो । मिरान्डेस अन्तिम चारमा पुग्ने एक मात्र तल्लो श्रेणीको टोली हो । सेमिफाइनलको लागि ड्र शुक्रबार तय हुनेछ । सेमिफाइनल खेल होम र अवे लेगमा खेलिनेछ ।
