काठमाडौँ – शनिबार एकै दिन १ सय ८९ जनामा कोरोना भाइरस संक्रमणको पुष्टि भएको छ। देशका विभिन्न प्रयोगशालामा गरिएको परीक्षणबाट १ सय ८९ जनामा कोरोना भाइरस संक्रमणको पुष्टि भएको हो।
शनिबार कोरोना पुष्टि भएकाहरुमा एक सय ८५ पुरूष र चार जना महिला रहेको स्वास्थ्य तथा जनसंख्या मन्त्रालयका प्रवक्ता डाक्टर विकास देवकोटाले जानकारी दिए।
राष्ट्रिय जनस्वास्थ्य प्रयोगशाला काठमाडौं मा गरिएको परीक्षणमा १ सय २४ जनाको पोजेटिभ देखिएका मध्ये धनुषाका २० देखि ४२ वर्ष उमेर समुहका ७ जना पुरुष, झापाका एक जना ४५ वर्षीय पुरुष, कपिलवस्तुका ७७ जना १६ देखि ६० वर्ष उमेर समुहका पुरुष र ललितपुरकी एक जना २३ वर्षीया महिला रहेका छन्।
यस्तै महोत्तरीका ४ जना २५ देखि ५५ वर्षीय पुरुषहरु, रौतहटका ६ जना १८ देखि ४५ वर्षीय पुरुषहरु, सर्लाहीका १७ जना १६ देखि ४० वर्ष उमेर समुहका पुरुषहरु र सिराहाका ११ जना १७ देखि ४० वर्ष उमेर समूहका पुरुषहरुमा पनि कोरोनाको पुष्टि भएको छ।
यस्तै शनिबार थप १३ जना कोरोना भाइरस संक्रमण मुक्त भएर घर फर्किएका छन्। जससँगै नेपालमा कोरोना संक्रमण जितेर घर फर्किनेको संख्या २ सय १९ पुगेको छ।
