काठमाडौँ – आज २ सय १ जना भन्दा बढीमा कोरोना भाइरस संक्रमणको पुष्टि भएको छ। देशका विभिन्न प्रयोगशालामा गरिएको परीक्षणबाट बुधबार २ सय १ जनामा कोरोना भाइरस संक्रमणको पुष्टि भएको हो।
स्वास्थ्य तथा जनसंख्या मन्त्रालयका प्रवक्ता डाक्टर विकास देवकोटाले मन्त्रालयको नियमित पत्रकार सम्मेलनका क्रममा विभिन्न जिल्लाका २ सय १ जनामा कोरोनाको पुष्टि भएको जानकारी दिए। बुधबार कोरोना पुष्टि भएकाहरुमा १ सय ७९ जना पुरुष र २२ जना महिला छन्।
बुधबार नयाँ पुष्टिसँगै नेपालमा कोरोना भाइरस संक्रमितको संख्या २ हजार ३ सय पुगेको छ। जसमध्ये २ हजार १ सय ३० जना पुरुष छन् भने १ सय ७० महिला छन्।
नेपालमा थप १२ जना डिस्चार्ज भएका छन्। देशका विभिन्न अस्पतालमा उपचार भइरहेका १२ जना डिस्चार्ज भएका हुन्। यससँगै नेपालमा कोरोना संक्रमण निको भएर घर फर्किनेको संख्या २ सय ७८ पुगेको छ। संक्रमण निको भएर घर फर्किनेमा २ सय २२ जना पुरुष र ५६ जना महिला रहेका छन्।
बितेको २४ घण्टामा ४ हजार ९ सय २४ जनामा पिसिआर विधिबाट कोरोना भाइरस परीक्षण गरिएको प्रवक्ता डाक्टर विकास देवकोटाले जानकारी दिए।
