काठमाडौँ – भारतमा दैनिक कोरोना संक्रमणमा ह्वातै वृद्धि भएको छ। बितेको ४ दिनमै त्यहाँ १ लाख भन्दा बढी कोरोना संक्रमित फेला परेका छन्।
बुधबार मात्रै त्यहाँ ३२ हजार ६ सय ८२ कोरोना भाइरस संक्रमित फेला परेका छन्। यो संख्या एकै दिन भेटिएका कोरोना भाइरस संक्रमितको अहिले सम्मकै ठूलो संख्या हो।
भारतमा बुधबार मृत्यु संख्यामा पनि उच्च वृद्धि भएको छ। त्यहाँ बुधबार ६ सय १४ जनाको ज्यान गएको छ। यो संख्या एकै दिन भारतमा संक्रमितले ज्यान गुमाएको दोस्रो ठूलो संख्या हो। भारतमा अहिले सम्म २४ हजार ९ सय २९ जनाको ज्यान गैसकेको छ।
भारतमा सक्रिय संक्रमितको संख्या भन्दा निको हुनेको संख्या उच्च छ। भारतमा फेला परेका कुल कोरोना भाइरस संक्रमित मध्ये ६ लाख १३ हजार ७ सय ३५ जना निको भइसकेका छन्। जबकी भारतमा सक्रिय संक्रमितको संख्या ३ लाख ३१ हजार ५ सय ५ मात्रै छ। त्यस मध्ये करिब ९ हजारको अवस्था गम्भीर छ।
