काठमाडौँ – पत्रकारको ज्याकेट लगाएर प्रहरीलाई ढुंगा हान्ने एक युवकलाई प्रहरीले पक्राउ गरेको छ।
बिहीबार पुल्चोकमा मच्छिन्द्रनाथको रथ तान्ने स्थानीय युवा र प्रहरी बीच झडप हुँदा प्रहरीलाई ढुंगा हान्ने थप एक युवकलाई प्रहरीले पक्राउ गरेको हो।
पक्राउ पर्नेमा महालक्ष्मी नगरपालिका– १३ इमाडोलका २१ वर्षका अनिश महर्जन रहेका छन्। प्रेस लेखेको ज्याकेट लगाएका र हातमा क्यामेरा बोकेका उनले बिहिबार प्रहरीलाई ढुंगा हानेका थिए। पक्राउ पश्चात उनी कुनै सञ्चार माध्यममा संलग्न नरहेको र प्रेस कार्ड पनि नभएको खुल्न आएको महानगरीय अपराध महाशाखाले जनाएको छ।
वर्षा र सहकालका देवता’ रातो मच्छिन्द्रनाथको रथयात्रा गर्न जबर्जस्ती हजारौँ युवा पुल्चोकमा उत्रिँदा प्रहरी र स्थानीय बीच झडप भएको थियो। त्यसक्रममा प्रहरीले पानीको फोहरा र अश्रुग्यास प्रहार भिडलाई नियन्त्रणमा लिन परेको थियो।
