काठमाडौँ – महिनाको पहिलो दिन घटेको सुनको मूल्य आज बढेको छ। नेपाल सुनचाँदी व्यवसायी महासङ्घका अनुसार आज सुनको मूल्य तोलामा ४ सयले बढेको हो।
आज शुक्रबार सुनको मूल्य तोलामा ४ सयले बढेसँगै छापावाला सुनको मूल्य ९७ हजार कायम भएको महासङ्घले जनाएको छ। यस्तै आज तेजाबी सुनको मूल्य पनि तोलामा ४ सयले बढेको छ। आज तेजाबी सुनको मूल्य ९६ हजार ५ सय कायम भएको छ।
यस अगाडी बिहिबार सुनको मूल्य तोलामा ९ सय रुपैंयाले घटेको थियो। जसपश्चात छापावाला सुनको मूल्य ९६ हजार ६ सय कायम भएको थियो। बुधबार भने नेपाली बजारमा छापावाला सुनको मूल्य स्थित रहेको थियो। बुधबार र मंगलबार छापावाला सुन ९७ हजारमा कारोबार भएको थियो।
गत महिना सुनको मूल्यमा लगातार घटबढ भएको थियो। भदौ महिनामा सुनको मूल्य १ लाख ४ सय सम्म पुगेको थियो भने सबै भन्दा कम ९५ हजार ८ सय सम्ममा घटेको थियो।
त्यस्तै साउन महिनामा भने सुनको मूल्यमा उच्च वृद्धि भएको थियो। साउन महिनामा सुनको मूल्यले रेकर्ड बनाएको थियो। त्यस समयमा सुनको मूल्य लाख कटेर १ लाख ३ हजार ५ सय सम्म पुगेको थियो।
चाँदीको भाउ
आज चाँदीको मूल्य पनि बढेको छ। आज चाँदीको मूल्य तोलामा १० रुपैंया बढेको महासङ्घले जनाएको छ। जससँगै चाँदीको मूल्य १ हजार ३ सय ३० पुगेको छ।
