काठमाडौँ – गाईको मासु सहित तीन जनालाई प्रहरीले बाँकेबाट पक्राउ गरेको छ। बाँकेको खजुरा गाउँपालिकाको रनियापुरबाट ७ किलो गाईको मासुसहित तीन जनालाई प्रहरीले पक्राउ गरेको हो।
पक्राउ पर्नेहरुमा खजुरा गाउँपालिका–८ रनियापुर चमकदारपुरका ४५ बर्षीय चुन्नी खाँ, ५० बर्षीय शब्बीर खाँ र ३४ बर्षीय अब्दुल आशीक खाँ रहेका छन्।
उनीहरुलाई इलाका प्रहरी कार्यालय धनौलीबाट खटिएको प्रहरी टोलिले पक्राउ गरेको हो। सब्बीर खाँको घरदेखि अन्दाजी दुई किलोमिटर उत्तरपूर्वमा रहेको अस्फाक खाँको खेतबारीमा गाईको मासु भाग लगाइरहेको सूचना पाएपछि गएको प्रहरी टोलिले तीनै जनालाई नियन्त्रणमा लिएको बताइएको छ।
तीनै जनालाई शब्बीर खाँको घरबाट पक्राउ गरिएको इलाका प्रहरी कार्यालय धनौलीका प्रहरी निरिक्षक वसन्त आचार्यले बताए। प्रहरीले घटनास्थलबाट गाईको हड्डी र छाला बरामद पनि बरामद गरेको छ।
