काठमाडौँ : बालिकामाथि जबर्जस्ती गरेको आरोपमा एकजना जनप्रतिनिधि पक्राउ परेका छन् ।
पर्वतको कुश्मा नगरपालिका–९ कटुवाचौपारी की ९ वर्षीय बालिकालाई करणी गरेको आरोपमा स्थानीय ६९ वर्षीय विष्णुहरि पराजुलीलाई प्रहरीले नियन्त्रणमा लिएको हो ।
गत साउन ६ गते साँझ वडा सदस्य समेत रहेका पराजुलीले बालिकालाई दुष्कर्म गरेको खुलासा भएपछि गाउँमै मिलापत्र गर्ने खोजिएपनि पर्वतमा क्रियाशील मानव अधिकारकर्मी र प्रहरीको सहकार्यमा उनलाई नियन्त्रणमा लिइएको जिल्ला प्रहरी कार्यालय पर्वतका प्रहरी निरीक्षक राजन रायमाझीले जानकारी दिए ।
उनका अनुसार पराजुलीले आफ्नै मिलमा बोलाएर बालिकालाई १० रुपैंया दिई ललाईफकाई दुष्कर्म गरेका थिए। त्यसपश्चात पिडित बालिकाका परिवारलाई १ लाख दिने सर्तमा मिलापत्र गरेको खुल्न आएको हो ।
सो घटना गाउँमै मिलपत्र भएको सूचना प्राप्त भएपछि आरोपित पराजुलीलाई प्रहरीले उनकै घरबाट नियन्त्रणमा लिई अनुसन्धान अघि बढाएको हो।
