काठमाडौँ – पूर्वपतिले खुकुरी प्रहार गर्दा सोलुखुम्बुमा एक महिलाको ज्यान गएको छ। सोताङ गाउँपालिका–३ मा पूर्वपतिको खुकुरी प्रहारबाट एक महिलाको ज्यान गएको हो।
ज्यान गुमाउनेमा २८ वर्षीया सोमा लामा रहेकी छन्। उनलाई उनन्तीस वर्षीय पूर्वपति होमबहादुर राईले खुकुरी प्रहार गरेका थिए। खुकुरी प्रहार पश्चात उनको घटनास्थलमै ज्यान गएको बताइएको छ।
होमबहादुर र सोमा श्रीमान् श्रीमती भए पनि २०७७ वैशाखदेखि सोमा स्थानीय २७ वर्षीय नन्दराज राईसँग गएर सँगै बस्दै आएको पाइएको छ ।
स्थानीय कुमार राईको घरमा बुधबार साँझ भेट भई विवाद हुँदा होमबहादुरले खुकुरी प्रहार गरी टाउको तथा शरीरको अन्य विभिन्न भागमा हान्दा सोमाको घटनास्थलमै मृत्यु भएको जिल्ला प्रहरी कार्यालय सोलुखुम्बुका सूचना अधिकारी महेन्द्र दर्नालले जानकारी दिए ।
घटनाको विषयमा प्रहरीमा जानकारी हुनासाथ इलाका प्रहरी कार्यालय सोताङबाट प्रहरी निरीक्षक अनिल माबोहाङको टोली गई ज्यान लिएको आरोपमा होमबहादुर राईलाई पक्राउ गरिएको प्रहरीले बताएको छ ।
प्रहरीका अनुसार महिलाको शव परीक्षणका लागि प्राथमिक स्वास्थ्य केन्द्र सोताङमा राखिएको छ भने आरोपितलाई जिल्ला प्रहरी कार्यालय सल्लेरीतर्फ ल्याइँदै छ ।
