एजेन्सी – जर्मन बुन्डेस लिगाको पहिलो क्लासिको ‘डेर क्लासिको’ अर्थात बोरुसिया डर्टमुन्ड र बायर्न म्युनिखबीचको खेल आज राति हुदैछ ।
खेल सिग्नल इडुना पार्कमा नेपाली समयअनुसार राति ११ः१५ बजे हुनेछ । दुवै टोली सिजनको पहिलो क्लासिको आफ्नो पक्षमा पार्दै शीर्षता बढाउने लक्ष्यमा हुनेछन् । ६ खेलबाट समान १५ अंक रहेपनि बायर्न शीर्षस्थानमा तथा डर्टमुन्ड दोस्रो स्थानमा रहेको छ ।
यो खेललाई रोबर्ट लेवान्डोस्की भर्सेस एर्लिङ ब्राउट हालान्डबीचको घम्साघम्सीको रुपमा समेत हेरिएको छ । किनकि दुवै खेलाडीले लगातार गोल गरिरहेका छन् । २० वर्षीय हालान्डले यो सिजनको बुन्डेसलिगाको ५ खेलमा ५ गोल तथा दुई असिस्ट दिएका छन् । यस्तै ३२ वर्षीय लेवान्डोस्कीले यो सिजनको बुन्डेसलिगामा ५ खेलमा १० गोल गर्दै ३ असिस्ट दिएका छन् ।
डर्टमुन्डसँग हालान्सँगै जाडोन सान्चो, जियोभानी रेना, मार्काे रिउस, एक्सेल विस्टेल, म्याट हमेल्स, थोमस म्युनियर, म्यानुयल एकान्जी, राफयल गुरेरो, महमुद दाहुद र गोलरक्षक रोमन बुर्की छन् ।
यता बायर्नसँग लेवान्डोस्कीसँगै थोमस मुलर, किङ्सले कोमान, सर्ज जिनाब्री, लियोन गोरेट्जका, योसुवा किम्मिख, लुकास हर्नान्डेज, डेभिड खल्वा, जेरोमी बोएटिङ, बेन्जामिन पाभार्ड र गोलरक्षक तथा कप्तान म्यानुयल नोएर छन् ।
बायर्न सेप्टेम्वरमा होफेनहाइनसँग ४–१ ल पराजित भएयताको पछिल्लो ९ खेलमा अपराजित छ । डर्टमुन्ड अक्टोवरमा इटालियन क्लब लाजियोसँग पराजित भएयता चार खेलमा अपराजित रहेको छ ।
यि दुई टोलीबीचको पछिल्लो ३५ खेलको नजिता हेर्दा बायर्न हावी देखिएको छ । बायर्नले १७ खेल आफ्नो पक्षमा पार्दा डर्टमुन्ड १२ खेलमा विजयी भएको छ । ६ खेल बराबरीमा टुगिंएको छ । पछिल्लो तीन खेलमा डर्टमुन्डले बायर्नलाई हराउन सकेको छैन । डर्टमुन्ड बायर्नसँगको हारको श्रृंखला तोड्ने लक्ष्यमा रहदा बायर्न सोही जितको लयलाई निरन्तरता दिने दाँउमा हुनेछ ।
