पूर्व बार्सिलोना स्टार आर्टुरो भिडालले लियोनल मेस्सी र क्रिस्टियानो रोनाल्डो बीच कुनै तुलना गर्न नमिल्ने कुरा बताएका छन्। उनी भन्छन, “लियोनेल मेस्सी र क्रिस्टियानो रोनाल्डोबीच कुनै तुलना गर्न मिल्दैन”, बार्सिलोनाका पूर्व मिडफिल्डर अर्जेन्टिनी आइकनलाई अर्को ग्रहका खेलाडी मान्छन्।
मेस्सी र रोनाल्डो बीच को उत्कृष्ट भन्ने चर्चा विगत एक दशकदेखि चलिरहेको छ। मेस्सी र रोनाल्डोले संयुक्त ११ ब्यालुन डी’ ओर जितेका छन्। हरेक मानिसको यो विषयमा फरक मत छ।
तर भिडालको लागि केवल एक तार्किक विकल्प छ, ३३ वर्षीय उनले कोर्रिएरे डेल्लो स्पोर्टलाई भने, “मेस्सी र रोनाल्डोको बीचमा कुनै तुलना छैन। लियो अर्को ग्रहबाट आएका हुन्।”
“मैले मेस्सीसँग बिताएको दुई वर्षका धेरै कुरा मेरो हृदयमा छन्। हामी बीचमा एक सुन्दर मित्रता स्थापना भएको थियो, यस्तो सम्बन्ध सदाका लागि रहनेछ।”
मेस्सीसँग २ वर्ष बार्सिलोनामा बिताएका भिडाल गत ट्रान्सफर विन्डोमा इन्टर मिलान गएका हुन्। बार्सिलोनामा रहँदा उनले १ लालिगा उपाधि जितेका थिए। “म बार्सिलोनामा खुसी थिएँ, धेरै खेलाडीहरु राम्रा साथी भए, तर परिस्थिति परिवर्तन भयो र मैले यहाँ आउने निर्णय गरें। मलाई फेरि सेरी ए जित्ने भोक छ र मैले च्याम्पियन्स लिग ट्रफीको सपना देखेको छु।” भिडाल भन्छन्।
