काठमाडौँ – निकिशा श्रेष्ठमाथि दुर्व्यवहार गरेको भिडियो अपलोड गर्ने एक जना पक्राउ परेका छन्। निकिशा श्रेष्ठमाथि दुर्व्यवहार गरेको भिडियो टिकटकमा अपलोड गर्ने एक जनालाई प्रहरीले पक्राउ गरेको हो।
पक्राउ पर्नेमा भक्तपुर नगरपालिका–२ टौमढीका विशेष जोशी रहेका छन्। जोशीलाई आज बिहीबार पक्राउ गरिएको प्रहरीले जनाएको छ। पक्राउ परेका जोशीले नै भिडियो अपलोड गरेको प्रहरीको भनाई छ। प्रहरीका अनुसार जोशीलाई नेपाल प्रहरीको साइबर ब्युरोले भक्तपुरमा नियन्त्रणमा लिएको हो।
निकिशामाथि भक्तपुरमा दुर्व्यवहार भएको भिडियो सार्वजनिक भएपछि चर्को विरोध भएको थियो भने दुर्व्यवहार गर्नेहरुलाई कारवाहीको माग गरिएको थियो।
सामाजिक संजाल देखि अनलाइन मिडियामा समेत उक्त घटनाको चर्को आलोचना भएको छ। भिडियो बाहिरिएपछि नेपाल प्रहरीको केन्द्रीय कार्यालयले साइबर ब्युरोलाई छानविन र अनुसन्धान गर्न पत्राचार गरेको थियो ।
भिडियो उनले अपलोड गरेको भए पनि खिचेका हुन् वा होइनन् भन्नेबारे अनुसन्धान भइरहेको प्रहरीले जनाएको छ । घटनामा संलग्न अन्य व्यक्तिको पनि प्रहरीले खोजी गरिरहेको छ।
