काठमाडौँ : शुक्रबार बिहान काठमाडौँ महानगरको गाडीले ठक्कर दिँदा २ वटा ट्याक्सीमा क्षति पुगेको छ ।
काठमाडौंको सिफलचौरमा महानगरको बा १ ग २२९८ नम्बरको गाडी पार्किङ गरिरहेका ट्याक्सीमाथि चडन पुगेको हो ।
चालकले मादक पदार्थ सेवन गरेर महानगरको गाडी चलाउँदा जयवागेश्वरी मन्दिरसँगैबाट भण्डारखालको जंगल सकिएलगत्तैको मोडमा अग्लो माटोको ढिस्को नाघेर गाडी चौर हुँदै अर्को साइडको बाटोमा पार्किङ गरिरहेका ट्याक्सीमाथि चढ्न पुगेको स्थानीयले बताएका छन् ।
चालकले अन्धधुन्ध गाडी हाँकेको देखेपछि भागेर ज्यान जोगाउन सफल भएको पैदलयात्रीले सुनाए । आफूहरु सचेत नभएको अवस्थामा ठूलो मानवीय क्षति हुने देखिएको प्रत्यक्षदर्शीको भनाइ छ ।
उक्त घटनाबारे सूचना पाएलगत्तै प्रहरीले गाडी चालकलाई नियन्त्रणमा लिएर अनुसन्धान अघि बढाएको छ ।
