एजेन्सी – स्पेनिस क्लब रियल म्याड्रिड युईएफए च्याम्पियन्स लिगको सेमिफाइनलमा प्रवेश गरेको छ । इंग्लिस क्लब लिभरपुलसँग क्वाटरफाइनलको दोस्रो लेगमा गोलरहित बरारबरीमा रोकिएपनि रियलले समग्रमा ३–१ को जित निकाल्दै अन्तिम चारको यात्रा तय गर्न सफल भएको हो ।
रियलले पहिलो लेगमा ३–१ को जित निकालेको थियो । एनफिल्डमा बुधबार राति भएको खेलमा लिभरपुलले रियललाई दवावमा राखेपनि गोल गर्न नसक्दा लिभरपुल अघि बढ्न सकेन । च्याम्पिन्स लिगको सर्वाधिक सफल रियलले दुई वर्षपछि सेमिफाइनलमा स्थान बनाउन सफल भएको हो । रियल पछिल्लो दुई संस्करण क्वाटरफाइनलभन्दा अघि बढ्न सकेको थिएन ।
अब रियलले सेमिफाइलमा इंग्लिस क्लब चेल्सीको सामना गर्नेछ । चेल्सीले पोर्चुगिज क्लब एफसी पोर्टाेलाई समग्रमा २–१ ले पराजित गर्दै सात वर्षपछि सेमिफाइनलमा स्थान बनाएको थियो । अर्काे सेमिफाइनलमा पेरिस सेन्ट जर्मेन (पीएसजी) र इंग्लिस क्लब म्यानचेस्टर सिटीबीच प्रतिस्पर्धा हुनेछ ।
खेलको दोस्रो मिनेटमा नै मोहम्मद सलाहको प्रहारलाई रियलका गोलरक्षक थिवाउट कोर्टुवाले बचाए । ११औं मिनेटमा जेम्स मिल्नरले इडर मिलिसाओलाई बिट गर्दै गरेको प्रहारलाई कोर्टुवाले अर्काे बचाउ गरे । २०औं मिनेटमा करिम बेन्जेमाको पासमा भिनिसियस जुनियरको प्रहार पोस्टमा लागेर फर्कदा रियल अग्रता लिनबाट चुक्यो ।
४२औं मिनेटमा जर्जिन्हो वाइनाल्डमको प्रहार क्रसबारमा लागेर बाहिरिदा लिभरपुलले अग्रता बढाउन सकेन । ६६औं मिनेटमा फेडे भाल्भेर्डेको पासमा भिनिसियस जुनियरको प्रहारलाई गोलरक्षक एलिसन बेकरले विफल पारे ।
८१औं मिनेटमा अल्भारो ओर्डिजोलाको क्रसमा करिम बेन्जेमाको बाउन्स हेडर नेटमा लाग्दै बाहिरियो । इन्ज्युरी समयका थप गरिएको दोस्रो मिनेटमा सलाहको प्रहारलाई गोलरक्षक कोर्टुवाले विफल पार्दै खेललाई बराबरीमा रोक्दै रियललाई अन्तिम चारको बाटो देखाए ।
