पूर्व अर्जेन्टिनी स्ट्राइकर गोल्जालो हिगुइनका अनुसार फुटबलका मोडर्न डे ग्रेट द्वय मेस्सी र रोनाल्डो दुबैलाई उनले जत्तिको कसैले पनि बुझ्न सकेको छैन। यी दुई महान् खेलाडीलाई सबैभन्दा धेरै आफूले बुझेको हिगुइनले दाबी गरेका छन्।
अर्जेन्टिनी अन्तराष्ट्रिय टोलीका लागि त्यति सफल हुन नसकेका इन्टर मायामी स्ट्राइकरले आफ्नो उत्कृष्ट करियरमा मेस्सी र रोनाल्डो दुबैसँग खेल्ने अवसर प्राप्त गरे। उनले अर्जेन्टिनी राष्ट्रिय टोलीमा लियोनल मेस्सीसँग खेल्ने मौका पाए भने रियल म्याड्रिड र युभेन्टसमा क्रिस्टियानो रोनाल्डोसँग खेले।
आफूले यी दुई खेलाडीसँग धेरै खेलेको कारणले नै उनीहरुलाई धेरै बुझ्न सफल भएको उनको भनाइ छ। ला नासियोनसँगको अन्तर्वार्तामा उनले भने,”म उनीहरु दुबैसँग सबैभन्दा धेरै खेल्ने खेलाडी हुँ। त्यसैले, मैले दुबैलाई राम्रोसँग बुझेको छु। मलाई थाहा छ कि उनीहरुलाई के मन पर्छ र के मन पर्दैन। कस्तो अवस्थामा सहज महसुस गर्छन् र कस्तोमा असहज।”
मेस्सी र रोनाल्डोले पनि आफूसँग खेल्न मन पराउने हिगुइनले बताए। “उनीहरुले पनि मलाई मद्दत गर्न सक्ने महसुस गरे,” उनले भने। हिगुइनले मेस्सीसँग अर्जेन्टिनी राष्ट्रिय टोलीका लागि २००९ देखि २०१८ सम्म खेले भने रोनाल्डोसँग २००९ देखि २०१३ सम्म रियल म्याड्रिड र २०१८-२०१९ मा युभेन्टसमा खेल्ने मौका पाए।
