एजेन्सी – दुई ब्राजिलियन खेलाडी डिफेन्डर इडर मिलिसाओ र सेन्ट्रल मिडफिल्डर क्यासमिरोको गोल मद्दतमा उपाधि होडमा रहेको रियल म्याड्रिडले स्पेनिस ला लिगामा ओसासुनामाथि २–० को जित दर्ता गरेको छ ।
पहिलो हाफ गोलरहित बराबरीमा रोकिदा मिलिसाओ र क्यासमिरोले दोस्रो हाफमा चार मिनेटको अन्तरमा दुई गोल गर्दै रियललाई जित दिलाउँदै उपाधि होडलाई जीवितै राखेको हो । घरेलु मैदान अल्फ्रेडो डि स्टेफानोमा शनिबार राति भएको खेलमा रियलले बल पोसेसनमा पकड बनाएपनि गोलको लागि दोस्रो हाफ नै कुर्नुपरेको थियो ।
२५औं मिनेटमा मार्सेलोको क्रसमा इडेन हाजार्डको प्रहारलाई ओसासुनाका गोलरक्षक सर्जियो हेरेराले बचाए । लगत्तै त्यसमै प्राप्त कर्नरमा इडर मिलिसाओको फ्लिक हेडरलाई हेरेराले पञ्च गर्दै बचाउँदा रियल अग्रता लिनबाट चुक्यो ।
५६औं मिनेटमा एसेन्सियोको फ्रिकिकमा मिलिसाओको भली प्रहार क्रसबारबाट थोरै बाहिरियो । ७६औं मिनेटमा मिलिसाओले गोल गर्दै रियललाई १–० को अग्रता दिलाए । उनले इस्कोको कर्नरलाई सदुपयोग गरेका थिए ।
त्यसको चार मिनेटपछि ८०औं मिनेटमा क्यासमिरोले गोल गर्दै रियललाई २–० को महत्वपुर्ण जित दिलाए । उनले करिम बेन्जेमाको पासलाई सदुपयोग गरेका थिए । रियलले ओसासुनाविरुद्ध मिडफिल्डरद्धय टोनी क्रुस र लुका मोड्रिचलाई विश्राम दिएका थिए ।
जितपछि दोस्रो स्थानमा रहेको रियलको ३४ खेलबाट ७४ अंक पुगेको छ । रियल शीर्षस्थानको एट्लेटिको म्याड्रिडभन्दा २ अंकले पछि छ । एट्लेटिकोको समान खेलबाट ७६ अंक छ । पराजित ओसासुना ४० अंक जोडेर ११औं स्थानमा छ ।
ला लिगामा ३४औं चरणका खेल जारी रहँदा अब चार राउन्डको खेल बाँकी रहँदा ला लिगाको उपाधि होड निकै रोमाञ्चक र प्रतिस्पर्धात्मक बनेको छ । उपाधि होडमा एट्लेटिको र रियलसँगै बार्सिलोना र सेभिया रहेका छन् । एक खेल कम खेलेका बार्सिलोनाको ७१ तथा सेभियाको ७० अंक छ ।
