एजेन्सी – फ्रेन्च क्लब पेरिस सेन्ट जर्मेन(पिएसजी)का अर्जेन्टिनी खेलाडी एन्जल डी मारियाले युभेन्टस स्टार क्रिस्टियानो रोनाल्डो पिएसजी आउन मरिहत्ते गरिरहेको बताएका छन्। टावाइसी स्पोर्ट्सलाई अन्तर्वार्ता दिनेक्रममा रोनाल्डो पिएसजी आउन मरिहत्ते गरिरहेको बताएका हुन्।
डी मारियाले रोनाल्डो पिएसजी आउन धेरै नै लालाइत रहेको बताए। रोनाल्डो छिट्टै नै पिएसजीमा जोडिने अर्का सुपरस्टार हुन सक्ने तर्फ डी मारियाले संकेत गरे। हाल पिएसजीमा रहेका जस्ता खेलाडीहरु अन्य कुनै पनि क्लबमा नरहेको पनि उनले बताए। पिएसजीमा राम्रो गुणस्तर खेलाडीहरु ठूलो संख्यामा रहेको उनको भनाई छ।
“क्रिस्टियानो रोनाल्डो पिएसजी आउन मरिहत्ते गरिरहेका छन्। खेलाडीहरुको गुणस्तर र परिणाम केहि अद्वितीय छ। यो प्राय क्लबहरुमा हुदैन। जहिले पनि महान खेलाडीहरु सधैं सर्वश्रेष्ठ क्लबमा रहन चाहन्छन्।”,टावाइसी स्पोर्ट्सलाई अन्तर्वार्ता दिँदै डी मारियाले भने,”क्रिस्टियानो पक्कै यहाँ हुन चाहन्छन्, तर सौभाग्य कुरा पिएसजीले मेस्सीलाई पायो।”
मेस्सी बार्सिलोनामै रहन इच्छुक भएको समयमा पिएसजीले रोनाल्डोलाई भित्र्याउने कुरा चलेको थियो। रोनाल्डो युभेन्टसमा सन्तुष्ट नरहेको र उनले क्लब परिवर्तन गर्ने मनसाय बनाएको रिपोर्टहरु आएका थिए। तर मेस्सीले बार्सिलोना छाड्ने पक्का भएसँगै पिएसजीको ध्यान र प्राथमिकता मेस्सी तर्फ मोडिएको थियो। मेस्सी बार्सिलोनामा रहने पक्का भएको एक हप्ता पनि नबित्दै पिएसजीले मेस्सीलाई भित्र्यायो। अर्जेन्टिनाबाट धेरै वर्ष सँगै खेलेका मेस्सीलाई पिएसजीमा भित्र्याउन डी मारियाका कारणले पनि सहज भयो।
