एजेन्सी – डेनिस फरवार्ड मार्टिन ब्रेथवेटले दुई गोल र एक असिस्ट प्रदान गरेपछि बार्सिलोनाले स्पेनिस ला लिगाको नयाँ सिजनमा विजयी सुरुवात गरेको छ । बार्सिलोनाले घरेलु मैदान क्याम्प नोउमा रियल सोसीडाडलाई ४-२ ले हराएको हो ।
अर्जेन्टिनी फरवार्ड लिओनेल मेस्सीले क्लब छाडेपछि पहिलो प्रतिस्पर्धात्मक खेलमा उत्रिएको बार्सिलोनाले दुवै हाफमा २-२ गोल गरेको थियो । सोसीडाडले ३ गोलले पछि परेको स्थितिबाट लगातार दुई गोल गरेपनि खेलबाट कुनै अंक जोड्न सकेन । बार्सिलोनाका लागि फरवार्ड मेम्फिस डिपाए र डिफेन्डर एरिक गार्सियाले डेब्यु गरेका थिए ।
खेलको १९ औं मिनेटमा डिपाएकै फ्रिकिकमा जेरार्ड पिकेले गोल गर्दै बार्सिलोनालाई अग्रता दिलाएका थिए । इन्ज्युरी समयको दोस्रो मिनेटमा ब्रेथवेटले सिजनको पहिलो गोल गर्ने क्रममा बार्सिलोनाको अग्रता दोब्बर पारे । उनले फ्रेन्की डे जोङको पासलाई गोलमा परिणत गरेका थिए ।
खेलको ५९ औं मिनेटमा ब्रेथवेटले व्यक्तिगत दोस्रो गोल गरे । सोसीडाडका डिफेन्डरले पेनाल्टी क्षेत्रभित्र संयमित डिफेन्स गर्न नसक्दा पाएको बललाई उनले गोल गरेका थिए । ८२ औं मिनेटमा लोबेटेले गोल गर्दै सोसीडाडलाई खेलमा फर्काएका थिए । त्यसको तीन मिनेटपछि नै मिकेल ओयाराज्बालले गोल गर्दै बार्सिलोनालाई दबाबमा राखे ।
इन्जुरी समयको दोस्रो मिनेटमा सर्जी रोबर्टोले गोल गर्दै बार्सिलोनाको जित पक्का गरे । उनले मार्टिन ब्रेथवेटको पासमा सहज गोल गरेका थिए । यस जितसँगै बार्सिलोना अंक तालिकाको दोस्रो स्थानमा उक्लिएको छ । शीर्षस्थानको रियल म्याड्रिडले शनिबार अलाभेसमाथि ४-१ को जित निकालेको थियो । त्यस्तै एटलेटिको पनि गेटाफेमाथि २-१ को जितसँगै तेस्रो स्थानमा छ ।
