प्रिमियर लिग च्याम्पियन म्यानचेस्टर सिटीको साथमा मात्र २५ मिलियनमा पोर्चुगिज कप्तान क्रिस्टियानो रोनाल्डोलाई अनुबन्ध गर्ने मौका थियो तर क्लबले त्यसलाई लकार्दै टोटनह्याम कप्तान ह्यारी केनलाई क्लब भित्र्याउने तर्फ लागेको छ।
रोनाल्डोले यसबारे बोल्दै उक्त चर्चा गलत रहेको भनेता पनि केहि रिपोर्टका अनुसार रोनाल्डोका एजेन्ट जोर्जे मेन्डेस सिटीलाई न्यून मूल्यमा रोनाल्डो अफर गरेका थियो। अर्को सिजन क्लबसँग सम्झौता अन्त्य हुने भएकोले युभेन्टस पनि रोनाल्डोलाई बेच्न सकारात्मक रहेको बुझिएको छ।
स्पोर्ट्समेलको एक रिपोर्टका अनुसार रोनाल्डोलाई बेच्न युभे तयार भएको हल्ला साँचो भएको र उनका एजेन्टले सिटीलाई अफर गरेका हुन्। तर प्रिमियर लिग च्याम्पियनको प्रमुख लक्ष्य ह्यारी केन नै रहेको कारणले उक्त डिल इन्कार गरेको बताइएको छ। १५० मिलियन मार्केट भ्यालु रहेका केन सिटीका लागि ट्रान्सफर विन्डो खुले देखि नै प्रमुख टार्गेट रहेका थिए।
तर रोनाल्डोले भने मंगलबार इन्स्टाग्राममा एक पोस्ट गर्दै यी सबै चर्चा झुटो भएको दाबी गरेका थिए। रोनाल्डोले एक पोस्ट गर्दै आफू धेरै बोल्ने भन्दा धेरै काम गर्ने र पहिलो दिनबाट नै आफू आफ्नो लक्ष्य तर्फ अग्रसर भएर लागेको बताएका छन्। उनले रियल म्याड्रिडमा आफ्नो च्याप्टर बन्द भएको बताउँदै आफ्नो बारेमा अनावश्यक चर्चा चल्नु एक खेलाडी र व्यक्तिको अपमान भएको भन्दै कसैले पनि आफ्नो नाम अनावश्यक काममा प्रयोग नगर्न चेतावनी समेत दिएका थिए।