एजेन्सी – जर्मन च्याम्पियन बायर्न म्युनिखले प्रि-सिजनको मैत्रीपूर्ण खेलमा तल्लो श्रेणीको जर्मन क्लब रोताक एगर्नलाई २३-० ले पराजित गरेको छ ।
बायर्नको जितमा ५ खेलाडीले ह्याट्रिक पूरा गरे । मिडफिल्डर कोरेन्टिन टोलिसोले सर्वाधिक ४ गोल गर्दा बायर्नका १० खेलाडी गोल गर्न सफल भए । एक गोल भने आत्मघाती गोल भएको थियो । बायर्नले खेलको छैटौं मिनेटमा रेनाटो सान्चेसको गोलमा अग्रता लिएको थियो । त्यसको एक मिनेटमा नै लिओन जुआकुले अग्रता दोब्बर पारे ।
रोबर्ट लेवानडोस्कीले नवौं मिनेटमा स्कोर ३-० बनाए । लेवानडोस्कीले त्यसपछि १६ औं र २९ औं मिनेटमा गोल गर्दै ह्याट्रिक पूरा गरे । रेनाटो सान्चेसले २० औं तथा सर्ज गनाब्रीले ३४ औं मिनेटमा गोल गरे । टोलिसोले ३८ औं मिनेटदेखि ४२ औं मिनेटसम्म १-१ मिनेटको अन्तरमा ४ गोल गर्दै बायर्नलाई पहिलो हाफमा ११-० को अग्रता दिलाए ।
दोस्रो हाफमा थोमस मुलरले ४९ औं मिनेटमा गोल गरे । त्यसपछि क्वासी ओकेरे र सर्प्रित सिंहले ५५ औं र ५९ औं मिनेटमा गोल गरे । ६१ औं मिनेटमा मिलर तथा गोरेट्जकाले ४ मिनेटको अन्तरमा २ गोल गरेपछि स्कोर १७-० पुग्यो । ७३ औं मिनेटमा लार्स दिट्रिकले आत्मघाती गोल गरे भए ओकेरेले ७६ औं मिनेटमा स्कोर १९-० बनाए ।
गोरेट्जकाले ७९ औं मिनेटमा ह्याट्रिक पुरा गर्दा ८१ औं मिनेटमा एलेक्जेन्डर नोलेन्बर्गरले खाता खोले । ओकेरेले ८२ औं तथा मुलरले ८८ औं मिनेटमा गोल गर्दै ह्याट्रिक पूरा गरे । गत सिजन यसै टोलीविरुद्ध बायर्नले मैत्रीपूर्ण खेलमा २०-२ को जित निकालेको थियो ।
