काठमाडौँ – प्रहरी माथि दुर्व्यवहारको आरोप लगाएकी गायिका आस्था राउतलाई नेपाल आउने बितिकै पक्राउ नगरिने भएको छ। नेपाल फर्किए लगत्तै परिवारलेनै प्रहरी कार्यालयमा उपस्थित गराउने भएपछि प्रहरीले गायिका राउतलाई पक्राउ नगर्ने भएको हो।
महानगरीय प्रहरी परिसर काठमाडौंका अनुसार नेपाल फर्किएलगतै गायिका राउतलाई प्रहरी कार्यालयमा उपस्थित गराउन उनका परिवारले बचन दिएका छन्।
आस्था हाल नेपाल बाहिर छिन्। आस्था सांगेतिक कार्यक्रमको लागि नेपाल बाहिर गएको बताइएको छ। आस्था नेपाल फर्किएपछि परिवारले प्रहरी कार्यालय उपस्थित गराएपछि उनी माथि अनुसन्धान शुरु हुनेछ।
प्रहरी सङ्गठनलाई नै अपशब्द प्रयोग गरेको आरोप लागेकी गायिका आस्था राउतविरुद्ध प्रहरीले अभद्र व्यवहार कसुरअन्तरगत मुद्दा चलाएको छ ।आफूलाई प्रहरीले ‘तँ’ भनेर दुव्र्यवहार गरेको आरोप लगाउँदै गायिका राउतले प्रहरीलाई अपशब्द प्रयोग गरेको श्रव्यदृष्य सामग्री (भिडियो) बिहीबार सामाजिक सञ्जालमार्फत सार्वजनिक गरेकी थिइन् ।
दश मिनेट ३१ सेकेन्डको भिडियोमा उनले प्रहरीलाई गालीगलौज गरेको सुन्न सकिन्छ । त्रिभुवन अन्तरराष्ट्रिय विमानस्थलको आन्तरिक उडानतर्फको प्रस्थान कक्षमा भएको उक्त घटनाको सिसी टिभी फुटेज शुक्रबार सार्वजनिक भएको थियो । ‘फुटेज’मा प्रहरीको भन्दा गायिका राउतको गतिविधि शङ्कास्पद देखिएको प्रहरीले जनाएको छ ।
सिसी टिभी फुटेजमा महिला प्रहरी रमिता श्रेष्ठले सुुरक्षा जाँचका बेला कुनै दुव्र्यवहार गरेको नदेखिने बताउँदै महानगरीय प्रहरी कार्यालयका प्रमुख प्रहरी नायब महानिरीक्षक विश्वराज पोखरेलले राउतले नै अभद्र व्यवहार गरेको दाबी गरे । बुधबार अपराह्नको त्रिभुवन विमानस्थलको आन्तरिक उडान कक्षबाट राउत भद्रपुर जाने क्रममा शरीर जाँचका बेला उक्त घटना भएको थियो ।
