एजेन्सी – इटालियन महाररथी युभेन्ट्स कोपा इटालियाको सेमिफाइनलमा प्रवेश गरेको छ । बुधबार राति भएको खेलमा रोमालाई ३–१ ले पराजित गर्दै युभेन्ट्सले अन्तिम चारको यात्रा तय गरेको हो ।
युभेन्ट्सको जितमा रोनाल्डोसँगै रोड्रिगो बेन्टानकर र लियोनार्दाे बोनुचीले गोल गरे । रोमाले आत्मघाती गोल उपहार पाएको थियो ।
घरेलु मैदानमा खेलको २६औं मिनेटमा गोन्जालो हिगुआइनको क्रस पासमा क्रिस्टियानो रोनाल्डोले गोल गर्दै घरेलु टोलीलाई १–० को अग्रता दिलाए । ३८औं मिनेटमा रोड्रिगो बेन्टनकरले गोल गर्दै युभेन्ट्सको अग्रता दोब्बर पारे ।
पहिलो हाफको इन्ज्युरी समयमा लियोनार्दो बोनुचीले गोल गर्दै युभेन्ट्सलाई ३–० को अग्रतासहित सहज जिततर्फ अघि बढाए । दोस्रो हाफमा आत्मघाती गोलसँगै रोमा खेलमा फर्कने संकेत गर्यो । ५०औं मिनेटमा रोमाका अण्डर्सको प्रहार पोस्टको क्रस बारमा लागेर फर्कदै गोलकिपर बुफोनलाई लागेर गोल भएको थियो ।
त्यसपछि दुवै टोलीले थप गोल गर्न सकेन र युभेन्ट्स ३– १ ले विजयी भयो । अब युभेन्ट्सले एसी मिलान र टोरीनोबीचको विजेतासँग फाइन्ल प्रवेशका लागि खेल्नेछ । अर्काे सेमिफाइनलमा नेपोलीले इन्टर र फियोरेन्टिाबीचको विजेतासँग खेल्नेछ ।
नेपोलीले लाजियोलाई १–० ले पराजित गर्दै सेमिफाइन्लमा स्थन सुरक्षित गरेको थियो ।
