काठमाडौं – आईसीसी विश्वकप लिग-२ अन्तर्गत घरेलु मैदानमा हुने ओमान र अमेरिकासँगको त्रिकोणात्मक सिरिजको अन्तिम १४ सदस्य टोलीमा कमल सिंह ऐरीले पहिलो पटक स्थान बनाउने भएका छन् ।
शुक्रबार घोषणा हुन लागेको १४ सदस्य टोलीमा यसअघि यू१९ राष्ट्रिय टोलीबाट खेलिसकेका तीब्र गतिका बलर कमल सिंह ऐरी पहिलो पटक राष्ट्रिय टोलीमा परेका हुन् । बन्द प्रशिक्षणमा रहेका २४ खेलाडीबाट १४ सदस्य टोली घोषणा भएको हो । क्यानले अौपचारिक रुपमा केहिबेरमा नै टोली घोषणा गर्नेछ ।
घोषणा हुने टोलीमा तीव्र गतिका बलर सोमपाल कामी टोलीमा छैनन् । उनी पछिल्लो समय चोटको कारण टोली बाहिर रहँदै आएका छन् । त्यस्तै गत सेप्टेम्बरमा सिंगापुर जिम्बावे त्रिकोणात्मक टि ट्वान्टी सिरिजमा नेपाली टोलीमा डेब्यू गरेका कुशल मल्लले पनि घरेलु मैदानमा हुने ओडीआई त्रिकोणात्मक सिरिजमा स्थान बनाएका छन् । कुशलले पवन सरार्फको स्थान लिएका हुन् । कमलले सोमपालको स्थान लिएका हुन् ।
तीब्र गतिका बलर अभिनाष बोहरा र स्पिनर सुशन भारीले पनि पहिलो पटक ओडीआई मान्यता खेलमा पहिलो पटक परेका हुन् । यी दुबैले लिस्ट ए खेल खेलि सकेका छन् ।
नेपाल, ओमान र अमेरिकाबीचको त्रिकोणात्मक सिरिज माघ २२ देखी २९ सम्म कीर्तिपुर क्रिकेट मैदानमा हुँदै छ । ओमान र अमेरिकाले पनि आफ्नो अन्तिम टोली घोषणा गरि सकेका छन् ।
नेपाली टोली:
ज्ञानेन्द्र मल्ल (कप्तान), आरिफ शेख, दीपेन्द्र सिंह ऐरी, अभिनास बोहरा, विनोद भण्डारी, करण केसी, ललित नारायण राजवंशी, पारस खड्का, कुशल मल्ल कमलसिंह ऐरी, रोहित कुमार पौडेल, सुशन भारी, शरद भेषावकर र सन्दीप लामिछाने
टोली बाहिर :
पवन सरार्फ, कुशल भुर्तेल, सन्दीप जोरा, सुवास खकुरेल, सुनिल धमला, वसन्त रेग्मी, किशोर महतो, लोकेश बम, सुमित महर्जन र सोमपाल कामी ।
