एजेन्सी – बिग ब्यास लिग अन्तर्गत शुक्रबार भएको क्वालिफायर खेलमा मेलबर्न स्टार्स सिड्नी सिक्सर्ससँग ४३ रनले पराजित भएको छ । नेपाली स्पिनर सन्दीप लामिछानेको अनुपस्थितिमा स्टार्सले क्वालिफायरमा एकमात्र विदेशी खेलाडीका रुपमा पाकिस्तानी बलर हरीस रउफलाई खेलाएको थियो ।
जितका लागि १ सय ४३ रनको लक्ष्य पछ्याउने क्रममा मेलबर्न १८ ओभरमा मात्र ९९ रन जोड्दै अलआउट भयो । पहिलो ब्याटिङ गरेको सिड्नीले २० ओभरमा ७ विकेट गुमाउँदै १ सय ४२ रन जोडेको थियो । सिड्नीका ओपनर जोस फिलिपेले २८ बलमा ३४ रन जोडेका थिए । जोर्डन सिल्क २५ रनमा नटआउट रहंदा स्टिभ स्मिथले २४ रनको योगदान दिए । मेलबर्नका लागि स्पिनर एडम जाम्पाले मात्र ४ ओभरमा २१ रन खर्चेर ३ विकेट लिएका थिए ।
जवाफमा मेलबर्नले लगातार विकेट गुमाएको मेलबर्नका लागि ३ खेलाडीले मात्र दोहोरो अंकमा रन जोड्न सके । तल्लोक्रमका क्लिन्ट हिन्चक्लिफ २५ रनमा नटआउट रहँदा ओपनर निक म्याडीन्सन र कप्तान ग्लेन म्याक्सवेलले १६-१६ रन जोडे । सिड्नीका सन अबोटले ३ विकेट लिएका थिए ।
अब मेलबर्नले फाइनल प्रवेशका लागि च्यालेन्जर खेलमा प्रतिस्पर्धा गर्नुपर्नेछ । सिड्नी सिक्सर्स भने फाइनलमा प्रवेश गरिसकेको छ । मेलबर्न स्टार्सले एडिलेड स्ट्राइकर्स र सिड्नी थन्डरको विजेतासँग फाइनल प्रवेशका निम्ति प्रतिस्पर्धा गर्नेछ ।
