एजेन्सी – कोरोना भाइरस कोभिड १९ का कारण युरोपियन गायत विश्वका अधिकांश देशका फुटबल स्थागित छन् । विश्व व्यापी रुपमा संक्रमण कम भइनसकेकोले युरोपियन फुटबल सुरु हुने शंका छ ।
फुटबल पुनः सुरु हुन सकेन भने बार्सिलोनाका सुपर स्टार लियोन मेस्सीले यो सिजन गोल्डेन बुट गुमाउनु पर्ने हुन सक्छ । यद्दपी स्पेनिस ला लिगा स्थगित हुँदा मेस्सी सर्वाधिक गोलकर्ताका रुपमा रहेका छन् । यसपटक सिजनको सुरुवातमा चोटका कारण मेस्सी टोलीमा थिएनन् । सिजनको पाँचौं खेलमा ग्रानडाबाटको खेलबाट उनी खेल्न थालेका थिए ।
मेस्सीलाई फर्ममा आउन पनि समय लागेको थियो उनले अक्टुबर ६ मा सेभिल्लाविरुद्धको खेलमा गोल गरेका थिए । पाँच पटकका गोल्डन बुट विजेता मेस्सी अहिले युरोपमा सर्वाधिक गोलकर्ताको छैटौं स्थानमा छन् । उनको १९ गोल छ । पछिल्लो तीन पटक लगातार गोल्डेन बुट जितेको मेस्सीसँग लेस्टर सिटीका जेमी भार्डी रहेका छन् ।
लाजियोका सिरो इमोबिले २७ गोलका साथ शीर्षस्थानमा छन् । त्यसपछि २५ गोलका साथ बायर्न म्युनिखका रोर्बेट लेवान्डोस्की दोस्रो, २१ गोलका साथ क्रिस्टियानो रोनाल्डो तेस्रो स्थानमा छन् । त्यसपछि इर्लिङ हलान्ड र टिमो वेर्नर रहेका छन् ।
अर्को तिर ला लिगामा भने मेस्सी शीर्षस्थानमा छन् । उनी भन्दा ५ गोल कम गरेका करिम बेन्जिमा दोस्रो स्थानमा छन् । लुइस स्वारेज, जेरार्ड मोरेनो, लुकास पेरेज र रोजर मार्टीको समान ११ गोल छ ।
स्पेनिस फुटबल महासंघ र एसोसिएसन अफ स्पेनिस फुटबलर्स ला लिगाको सिजन सक्ने पक्षमा छन् । तर, अहिले सम्म फुटबल कहिलेबाट सुरु हुन्छ भन्ने अवस्था छैन । यदि ला लिगा सुरु भए भने उनले घरेलु लिग र युरोपको उच्च गोलकर्ताका लागि प्रतिस्पर्धा भने पक्कै गर्नेछन् ।
