एजेन्सी – बोरुसिया डर्टमुन्डका युवा फरवार्ड एर्लीङ ब्राउट हालान्डले युभेन्टसका फरवार्ड क्रिस्टियानो रोनाल्डो र स्विडिस फरवार्ड ज्लाटन इब्रहिमोभिच आफ्नो आदर्श खेलाडी रहेको बताएका छन् ।
हालान्डले क्लबको आधिकारिक वेबसाइटसँग अन्तर्वार्तामा आफूले रोनाल्डो र ज्लाटनको खेल हेरेर बाल्यकालमा धेरै सिकेको बताए । ‘ मैले बाल्यकालमा धेरै खेलाडी पछ्याएँ । तर दुई खेलाडीको प्रदर्शनले म निकै प्रभावित भएँ । रोनाल्डो र ज्लाटनमा बेग्लै भोक थियो । उनीहरु सधैं गोल र बलको भोको देखिन्थे,’ उनले भने ।
लकडाउनको समयमा आफूले कसरी समय बिताइरेहेको भन्ने प्रश्नमा उनले भने, ‘म ध्यान गर्नमा व्यस्त रहन्छु । कहिलेकाहीं साथीहरुसँग फिफा पनि खेलिरहेको छु । मलाई सबैभन्दा मनपर्ने खानेकुरा कबाब हो ।’
यसै सिजन युरोपेली फुटबलको शीर्ष लिगमा रेड बुल साल्जबर्गबाट डेब्यु गरेका हालान्ड जनवरीमा डर्टमुन्ड आएका हुन् । उनले डर्टमुन्डमा पनि आफ्नो उत्कृष्ट लयलाई कायम राखेका छन् । उनले ८ खेलमा ९ गोल गरिसकेका छन् ।
