काठमाडौँ – कोरोना भाइरस संक्रमण रोकथाम तथा नियन्त्रणका लागि सरकारले घोषणा गरेको लकडाउनकै बीच पर्सामा एक विवाह सम्पन्न भएको छ। लकडाउनकै बीच पटेर्वासुगौली गाउँपालिकामा बुधबार सामाजिक दूरी कायम गरी भिडभाड रहित विवाह सम्पन्न भएको हो।
पर्सागढी नगरपालिका–२ बागवन्ना निवासी बेहुला लालमोहनदास चौधरीले पटेर्वासुगौली गापा–४ फरहदवा टोल निवासी बेहुली रुस्तम चौधरीसँग विवाह गरे। विवाहमा बेहुलाको तर्फबाट बेहुला सहित पाँच जना र बेहुली तर्फबाट घरपरिवारका सदस्यहरू मात्र सहभागी भए।
बताइएअनुसार, बेहुला तीनवटा मोटरसाइकलमा पाँच जना जन्ती लिएर आएका थिए। विवाह सम्पन्न भएपछि उनले बेहुलीलाई पनि अन्माएर मोटरसाइकलमै लगे।
लालमोहनदास र रुस्तम बीच फागुनमा टिका टोलो भएको र विवाहको मिति बैशाख २४ गते तय भएको परिवारजनले बताए। पहिला तय भएकै मितिमा विवाह सम्पन्न गरिएको उनीहरुले बताए।
सङ्क्रमित ९९ मध्ये उपचारपछि घर फर्कनेको सङ्ख्या २२
कोभिड १९ को रोकथाम तथा नियन्त्रणका लागि पिसिआर विधिबाट हालसम्म १४ हजार ९६ को स्वास्थ्य परीक्षण गरिएको छ ।
स्वास्थ्य तथा जनसङ्ख्या मन्त्रालयमा आज आयोजित नियमित प्रेस ब्रिफिङमा र्यापिड डाइग्नोस्टिक विधिबाट ५२ हजार ९७० को नमूना परीक्षण गरिएको प्रवक्ता डा विकास देशकोटाले जानकारी दिए। गत २४ घण्टामा ९३१ वटा परीक्षण भएका छन् ।
तीव्र गतिमा विस्तार भइरहेको कोभिड १९ को आवश्यक सामग्री व्यवस्थापनसहित परीक्षणलाई प्रभावकारी ढङ्गबाट अघि बढाइने मन्त्रालयले जनाएको छ । मुलुकमा विभिन्न क्वारेन्टाइनमा रहने व्यक्तिको सङ्ख्या १९ हजार ७३४ छ भने आइसोलेसनमा रहेका बिरामीको सङ्ख्या १३६ छ । रेडजोनमा रहनेको सङ्ख्या ३३३ रहेको छ ।
कोशी अस्पतालमा उपचारमा रहेका छ जना सङ्क्रमितको परीक्षण नेगेटिभ देखिएकाले उनीहरु अस्पतालबाट बाहिरिएको डा देवकोटाले जानकारी दिए । अस्पतालमा कोभिडको उपचारपछि घर फर्कनेको सङ्ख्या हालसम्म २२ पुगेको छ ।
काठमाडौँका अस्पतालबाट वैशाख ११ गते डिस्चार्ज भएका पुरुषको पुनः नमूना परीक्षण गर्दा पोजेटिभ देखिएपछि उनलाई अस्पताल भर्ना गरिएको मन्त्रालयले जनाएको छ ।
त्यस्तै वैशाख १४ गते डिस्चार्ज भएका रौतहटका १९ वर्षीय र पर्साका ४४ वर्षीय पुरुषको पनि नमूना परीक्षण पोजेटिभ आएकाले नारायणी अस्पतालमा भर्ना गरिएको छ । वीरगञ्जबाट पठाइएको नमूना परीक्षणमा थप १७ जनाको नतिजा पोजेटिभ आएको छ । पछिल्लो नतिजासँगै हाल देशमा कोभिड १९ बाट सङ्क्रमितको सङ्ख्या ९९ पुगेको छ । उनीहरु सबैको स्वास्थ्यस्थिति सामान्य रहेको डा देवकोटाले जानकारी दिए।
