एजेन्सी – ब्राजिलको राष्ट्रिय फुटबल टोलीका पूर्व खेलाडी एडीलसनले आफू क्रिस्टियानो रोनाल्डो र लिओनेल मेस्सीभन्दा उत्कृष्ट रहेको दावी गरेका छन् ।
ब्राजिलका लागि २१ खेल खेल्दै ६ गोल गरेका एडिलसनको क्लब करीअर ब्राजिलियन लिगमा नै सिमित रहेको थियो । उनले पाल्मेरस, कोरिन्थियन्स र फ्लामेंगोबाट व्यावसायिक फुटबल खेलेका थिए । सन् २००२ मा जापान र कोरियामा आयोजित विश्वकप जित्दा उनी ब्राजिलियन टोलीमा रहेका थिए ।
आफ्नो करीअरमा युरोपेली फुटबलको कुनै क्लबबाट नखेलेका उनले विश्वकप विजेताको मेडल भएकै कारण आफू मेस्सी र रोनाल्डोभन्दा उत्कृष्ट रहेको बताए । ‘मैले आफ्नो उच्च विन्दुमा हुँदा नेयमारभन्दा राम्रो खेल्थें । उनले यदि मभन्दा राम्रो छु भनेर प्रमाणित गर्ने हो भने विश्वकप जित्नुपर्छ,’ एडीलसनले मेट्रोसँग भने ।
‘मसँग पनि खेल मैदानमा शालीनता थियो, त्यसैले मेस्सीले यदि मभन्दा राम्रो छु भन्ने हो भने विश्वकप जित्नुपर्छ । रोनाल्डोमा मात्र शारीरिक शक्ति र दुवै खुट्टाले बल प्रहार गर्न सक्ने क्षमता भएको हो, उनीभन्दा म बढी प्राविधिक रुपमा निपुण थिएँ ।’
एडीलसनले विश्वकप नै फुटबलको सबैभन्दा ठूलो उपाधि रहेको र यसलाई नजिती आफूलाई उत्कृष्ट दावी गर्न नसकिने बताए । एडीलसनले विश्वकपको सेमिफाइनलमा सुरुवाती रोजाईमा खेलेका थिए । उनले त्यसअघि क्वाटरफाइनल र समुह चरणका दुई खेलमा बेन्चबाट मैदान छिरेका थिए ।
