काठमाडौँ – नेपाली सेनाले भारतीय सेना प्रमुख जनरल मनोज नरवानेले लिपुलेक हुँदै कैलाश मानसरोवर जाने सडक निर्माणका सम्बन्धमा दिएको अभिव्यक्तिको उपयुक्त मञ्चमा आफ्नो धारणा व्यक्त गर्ने प्रतिक्रिया दिएको छ ।
उक्त सडक निर्माणका सम्बन्धमा भारतीय सेना प्रमुखबाट आएको पछिल्लो अभिव्यक्तिका सम्बन्धमा राखिएको जिज्ञासामा नेपाली सेनाका प्रवक्ता विज्ञानदेव पाण्डेले आवश्यकताअनुरुप नेपाली सेनाले प्रष्ट र जिम्मेवार ढङ्गबाट विधिसम्मत तथा उपयुक्त मञ्चमा आफ्नो धारणा व्यक्त गर्ने जानकारी दिए।
भारतीय सेना प्रमुख नरवानेले एक कार्यक्रममा मानसरोवर जाने वास्तविक नियन्त्रित रेखा (एलएसी)लाई लिपुलेक हुँदै गएको उक्त सडकमा कुनै विरोधाभाष नभएको अभिव्यक्ति दिएपछि नेपाली सेनाको उक्त प्रतिक्रिया आएको हो । भारतले नेपालको लिपुलेक, कालापानी र लिम्पियाधुरा क्षेत्र अतिक्रमण गरी सडक निर्माण गरेको विषयमा नेपाल सरकारले यस विषयमा आपत्ति जनाउँदै प्रतिक्रिया दिइसकेको छ ।
“कसैको भूमिमा सडक बनाएको छैन, लिपुलेकको विषयमा नेपाललाई कसैले उचाल्यो”
यसअघि भारतले नेपालको उक्त क्षेत्रलाई आफ्नो राजनीतिक नक्सामा समावेश गरेकामा नेपाल सरकारसहित सम्पूर्ण राजनीतिक दलले उक्त नक्सा सच्याउन भारतीय सरकारको गम्भीर ध्यानाकर्षण गराएका थिए ।
काठमाडौँ – नेपाली भूमिमा सडक निर्माण गरेको विषयमा नेपालले विरोध जनाइरहेका बेला भारतीय सेना प्रमुख मनोज मुकन्द नरवानेले भारतीय भूमिमै सडक निर्माण भएको दावी गरेका छन्।
शुक्रबार भारतीय सेना प्रमुख नरवानेले पालले अर्कैको इसारामा लिपुलेकको विषयमा कुरा उठाएको लगाउँदै भारतीय भूमिमै सडक निर्माण भएको दावी गरेका हुन्।
कुनै देशको नाम नलिएपनि उनले लिपुलेकको विषयमा नेपाललाई अर्को देशले उचालेको आरोप लगाए। भारतीय थिंक ट्यांकले आयोजना गरेको वेविनारमा उनले सडक भारतीय भूमिमा बनेको हुँदा विरोध हुनु बेकार रहेको तर्क गरे।
नेपाली राजदूतले काली नदी पूर्वको भूभाग नेपालको रहेको बताएको उल्लेख गर्दै उनले त्यसमा कुनै दुविधा नरहेको बताए। साथै उनले सडक काली नदीको पश्चिममा बनेको स्पष्ट पारे।
“वास्तवमा नेपाली राजदूतले काली नदी पूर्वी क्षेत्र नेपालको हो भनेर उल्लेख गरेका छन्। त्यसमा कुनै विवाद छैन। हामीले बनाएको सडक नदीको पश्चिम तर्फ हो। त्यसैले पनि उनीहरुले के कुरामा विरोध जनाइरहेका छन् मलाई थाहा छैन।”,उनले भनेका छन्,”त्यसैले पनि यो विश्वास गर्न सकिन्छ कि उनीहरुले कसैको इसारामा यस विषयलाई उठान गरिरहेका छन्। र यो सम्भव पनि छ।” यस्तै यस विषयलाई गत साता लद्दाख पूर्व र उत्तरी सिक्किममा भएको घटनालाई समेत जोडेर हेर्नुपर्ने उनको भनाई छ।
