काठमाडौँ – आज एकै दिन २ सय जना भन्दा बढीमा कोरोना भाइरस संक्रमणको पुष्टि भएको छ। मंगलबार एकै दिन २ सय ८८ जनामा कोरोना भाइरस संक्रमणको पुष्टि भएको हो।
स्वास्थ्य तथा जनसंख्या मन्त्रालयका प्रवक्ता डाक्टर विकास देवकोटाले मन्त्रालयको नियमित पत्रकार सम्मेलनका क्रममा विभिन्न जिल्लाका २ सय ८८ जनामा कोरोनाको पुष्टि भएको जानकारी दिए। मंगलबार कोरोना पुष्टि भएकाहरुमा २ सय ७० जना पुरुष र १८ जना महिला छन्।
मंगलबार फेला परेको कोरोना भाइरस संक्रमितको संख्या हाल सम्मकै उच्च हो। यस भन्दा अगाडी सोमबार एकै दिन २ सय २६ जनामा कोरोना भाइरस संक्रमणको पुष्टि भएको थियो।
मंगलबार नयाँ पुष्टिसँगै नेपालमा कोरोना भाइरस संक्रमितको संख्या २ हजार ९९ पुगेको छ। जसमध्ये १ हजार ९ सय ४९ जना पुरुष छन् भने १ सय ४९ महिला छन्।
यस्तै नेपालमा थप ४५ जना डिस्चार्ज भएका छन्। देशका विभिन्न अस्पतालमा उपचार भइरहेका ४५ जना डिस्चार्ज भएका हुन्। यससँगै नेपालमा कोरोना संक्रमण निको भएर घर फर्किनेको संख्या २ सय ६६ पुगेको छ। संक्रमण निको भएर घर फर्किनेमा २ सय १२ जना पुरुष र ५४ जना महिला रहेका छन्।
